Governu Esforsu Konklui Prosesu Greater Sunrise iha 2026

Ministru Petróleu no Rekursus Minerais, Francisco da Costa Monteiro, halo enkontru ho reprezentante Governu Austrália ba Greater Sunrise, Katrina Cooper iha Gabinete Ministru MPRM, Díli, Tersa (14/04/2026).

Díli, 15 Abríl 2026 (RAFA.tl)- Governu Timor-Leste liu husi Ministériu Petróleu no Rekursu Minerais (MPRM) halo esforsu tomak atu konklui prosesu Greater Sunrise entre Timor-Leste no Austrália iha tinan ne’e nia laran.

Notísia Relevante: Ministru Francisco Monteiro Garante Negosiasaun Finál Ba Dokumentu Greater Sunrise Termina iha Marsu Ne’e

Ministru Petróleu no Rekursus Minerais, Francisco da Costa Monteiro, ba jornalista sira hafoin enkontru ho Reprezentante Governu Austrália ba Greater Sunrise, Katrina Cooper iha Gabinete Ministru MPRM,  Díli, Tersa (14/04/2026) informa, iha enkontru ne’e parte rua ko’alia kona-bá progresu sira ne’ebé mak akontese iha Greater Sunrise no foin dau-daun iha fulan-Marsu halo progresu ida ne’ebé pozitivu tebes mak konsege finaliza ona dokumentu ida naran petroleum Mining Code, no husi parte negosiasaun ninian aseita ona katak ida ne’e iha ona, hanesan  prinsipal agreement ba dokumentu ida ne’e, ikus mai bele ba fali dokumentus rua sira seluk.

“Ekipa rua agora intensivu los hodi bele diskute asuntu pendente sira ne’ebé mak relasiona ho production content no iha fulan-Juñu sei iha ronda ba negosiasaun ba prezensa nian rua, ida iha Austrália no ida iha Timor-Leste. Espera katak husi ne’ebá bele halo ita besik liután konkluzaun dokuments rua seluk mós importante atu tenke finaliza hotu iha tempu badak,” Ministru Francisco da Costa Monteiro hateten.

Governante ne’e hatutan, desizaun ba planu úniku konseitu dezenvolvimentu kampu Greater Sunrise agora dau-dauk iha rua, ida bele ba Austrália, ida bele mai Timor-Leste, halo prosesu hotu hodi bele ba finaliza ida de’it no Timor-Leste nia pozisaun hakarak Greater Sunrise ne’e tenke mai Timor.

“Prosesu sira ne’ebé mak la’o hela ita nia trajetu negosiasaun atu konklui hotu iha tinan ne’e, klaru husi enkuadramentus legais hanesan PMC, PSC ho Fiscal Rezime, iha mós elementus balun iha ne’ebá ho prosesu balun mak sei guia mós oinsá mak Estadu rua bele orienta hodi akompaña progressu sira ne’e hodi bele konklui planu no konseitu dezenvolvimentu ba kampu ne’e lalais,” nia tenik.

Governante ne’e haktuir, prosesu ida ne’e mós sujeitu ba fatores barak inklui estudu sira ne’ebé mak agora halo konjuntamente ho Woodside iha Natarbora no mós tasi laran.

Jornalista:  Elio dos Santos/Editór: Vito Salvadór