Governu Austrália Aprezenta Dokumentu Importante Tolu Ba Timor-Leste Kona-bá Projetu Greater Sunrise

Reprezentante Governu Austrália ba Greater Sunrise, Katrina Cooper ho nia ekipa hasoru malu ho PM Xanana Gusmão iha Palásiu Governu, Sesta 25 Setembru 2026.

Díli, 25 Setembru 2026 (RAFA)- Reprezentante Governu Austrália ba Greater Sunrise, Katrina Cooper, Sesta-ne´e, aprezenta dokumentu importante tolu ne´ebé susesu akontese iha negosiasaun ikus foin daudaun iha Canberra-Austrália,  entre Timor-Leste ho Austrália.

Ministru Petroleu Rekursu Minarais (MPRM), Francisco Monteiro da Costa, ne’ebé akompaña  enkontru entre reprezentante Governu Austrália ba Greater Sunrise, Katrina Cooper ho Primeiru-Ministru Kay Rala Xanana Gusmão iha Palásiu Governu,  informa dokumentu tolu iha negosiasaun ne´e, inklui mós Sunrise Joint Venture ne´ebé konsegé  finaliza ona ho dokumentu sira ne’ebé ohin aprezenta.

“Ita iha ona inprinsipál agreement nian, agora sira mai informa mós katak Governu Austrália sei lori dokumentu tolu ne’e ba sira nia prosesu internu Governu Austrália nian para hetan aprovasaun. Ida-ne’e mak dokumentu prinsipál  nian ne’e hotu ona, entaun tinan oin, ita foku de’it ona ba konseitu development unikú nian, ita aprová tiha ida-ne’e, ita halai ona ba projetu ne’ebé mak  detallu para  bele halo konstrusaun iha futuru,” Ministru MPRM Francisco da Costa Monteiro informa.

Governante ne´e afirma prosesu dokumentu ne’ebé atu aprová iha Governu Austrália  sei bele lori fulan-tolu to’o fulan-neen, hodi finaliza.

Dokumentu tolu ne´e mak hanesan, primeiru kona-bá Petroleum Mining Code mak hanesan enkuadramentu jeral mekanizmu oinsá mak atu dezenvolve operasionál  atividade sira petroleum nian ba  greater sunrise hanesan rejime espesifikú.

Segundu  fiskál rejime mak  haré kona-bá  impostu katak, Timor-Leste no Austrália aseita ona katak sei iha inpostu unikú ida Timor-Leste mak sei jere ida-ne’e.

Terseiru mak Production Sharing Contract (PSC), ne’e hanesan kontratu entre Timor-Leste no Autrália liuhosi autoridade designada  para tama ho kompaña ne’ebé mak bele  koopera ho Greater Sunrise nian.

Jornalista : Zita Menezes