Governu Atribui Lisensa Ba Kompañia Nasionál Rua Hodi Kaer Ikan iha Tasi Timor

Ró peska ne'ebé hetan lisensa husi Governu atu hala'o atividade peska iha tasi Timor-Leste. Imajen/Mídia GPM

Díli, 20 Jullu 2026 (RAFA.TL)– Governu liuhosi Ministériu Agrikultura, Peska, Pekuária no Floresta (MAPPF), fatribui lisensa bá kompañia nasionál rua, Rayhana ho Comodities X Change, Lda, hodi hala’o atividade kaer ikan iha área tasi Timor-Leste.

Lansamentu ofisiál bá ró peska fibra vidru semi-indústria hala’o iha aredór Unidade Polísia Marítima (UPM), Lecidere, Dili, Segunda-ne’e ho prezensa Primeiru-Ministru Kay Rala Xanana Gusmão.

PM Xanana hateten Governu la’ós de’it fó lisensa atu kaer ikan, maibé mós preokupa  oinsá produtu peska sei distribui no transforma atu aumenta valór ekonomia no evita fa’an ikan fresku de’it iha merkadu.

“Ha’u lakohi entrega de’it buat hotu. Ha’u-nia preokupasaun maka tuir planu ne’e ró sira sei bá kaer ikan kada semana rua. Karik lori ikan barak mai Díli, tenke iha planu atu prosesa no preparasaun bá merkadu,” PM Xanana hateten.

Iha biban ne’e, Ministru Agrikultura, Peska, Pekuária no Floresta, Marcos da Cruz, esplika atribuisaun lisensa bá kompañia lokál rua ne’e hatudu kompromissu Governu nian atu fó oportunidade bá emprezáriu nasionál hodi partisipa diretamente iha dezenvolvimentu seitór peska.

Ministru Marcos da Crus hatutan, Timor-Leste iha liña kosteira naruk kilómetru 735 no Zona Ekonomia Eskluziva ho luan kilómetru kuadradu 72.000.

Poténsia rekursu peska atinje to’o 718.900 tonelada kada tinan, maibé durante ne’e foin esplora serka 2%, enkuantu parte boot seluk lakon tanba atividade peska ilegál.

Ró ne’ebé lansa  atu hala’o atividade peska ne’e hamutuk haat, kompostu hosi ró rua pertense bá Rayhana, ida bá Comodities X Change, Lda., no ida pertense bá Governu.

Ró Governu nian sei uza atu monitoriza no kontrola atividade ró peska sira ne’ebé simu lisensa no mós apoiu fiskalizasaun bá peskadór sira.

Na’in bá Kompañia Rayhana, Ricardo Cardoso Nheu kontente ho oportunidade ne’ebé IX Governu Konstitusionál fó bá emprezáriu nasionál atu investe iha seitór peska.

Ricardo Nheu promete hala’o atividade ho responsabilidade no servisu hamutuk ho entidade relevante sira atu supera difikuldade ne’ebé bele mosu.

Iha serimónia ne’e, Governu mós entrega sertifikadu lisensa no ekipamentu GPS ba ró sira, atu fasilita monitorizasaun no kontrolu atividade peska.

Jornalista: Zita Menezes/Editór: Vito Salvadór