Governu Aprova Planu Nasionál Integradu Ba Prevensaun no Kombate Rede Transnasionál Fraude Finanseira Dijitál

Ministru Prezidénsia Konsewllu Ministru, Hermenegildo Augusto "Agio" Pereira hamutuk ho Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, partisipa iha reuniaun Konsellu Ministru ne'ebé prezide husi Primeiru-MInistru Xanana Gusmão iha Palásiu Governu, Kuarta 5 Agostu 2026. Imajen/gov.tl

Díli, 05 Agostu 2026 (RAFA)- Reuniaun Konsellu Ministrus, Kuarta-ne’e, iha Palásiu Governu, aprova proposta husi Ministru Interiór, Francisco da Costa Guterres, kona-bá Rezolusaun Governu ne’ebé aprova Planu Nasionál Integradu ba Prevensaun no Kombate rede transnasionál fraude finanseira dijitál, ne’ebé suporta husi plataforma ilísita burla online (“SCAM”), kriminalidade sibernétika organizadu no tráfiku umanu ba períodu 2026-2031.

Iha komunikadu ofisiál ne’ebé RAFA sita haktuir planu ne’e estabelese estratéjia nasionál integrada hodi prevene no kombate ameasa sira ne’e, ne’ebé reprezenta risku boot ba seguransa nasionál, estabilidade ekonómika, soberania dijitál, integridade sistema finanseiru no reputasaun internasionál Timor-Leste nian, hodi reforsa koordenasaun entre servisu intelijénsia, forsa no servisu seguransa, órgaun investigasaun kriminál, autoridade finanseira no entidade sira ne’ebé responsável ba kontrolu fronteira.

Planu ne’e iha prioridade atu reforsa kapasidade Estadu hodi prevene, deteta, investiga no kombate krime sibernétika organizada no tráfiku umanu, proteje sistema finanseiru nasionál no infraestrutura krítika, hametin kontrolu migratóriu no seguransa fronteira, dezenvolve kapasidade téknika espesializada no promove kooperasaun rejionál no internasionál. Koordenasaun polítika no supervizaun ezekusaun nian sei kabe ba Komisaun Interministeriál Seguransa, no sei kria mós, liuhusi Dekretu Governu, Sentru Nasionál Koordenasaun, Avaliasaun no Kombate Ameasa Transnasionál (CN-CAT), ne’ebé depende direta ba Primeiru-Ministru, nu’udar mekanizmu permanente koordenasaun inter-institusionál.

Implementasaun planu ne’e sei hala’o iha faze tolu, husi tinan  2026 to’o 2031, ne’ebé iha faze dahuluk sei instala CN-CAT, define prosedimentu operasionál, halo levantamentu kapasidade nasionál no hahú revizaun kuadru lejizlativu. Iha faze daruak sei reforsa kapasidade téknika instituisaun sira nian, implementa sistema teknolójiku, dezenvolve operasaun konjunta no hakle’an kooperasaun internasionál, no ikus mai iha tinan 2031 sei konsolida kapasidade nasionál, halo avaliasaun ba rezultadu ne’ebé hetan no atualiza Planu Nasionál, hodi asegura resposta ne’ebé sustentável no koordenada ba ameasa transnasionál sira.

Jornalista: Zita Menezes