Governu Aprova Orsamentu Retifikativu Millaun 177 USD Hodi Sustenta OJE 2026

PM Xanana Gusmão lidera reuniaun Konsellu Ministru iha Palásiu Governu, Kuarta (13/05/2026). Imajen/gov.tl

Díli, 13 Maiu 2026 (RAFA.tl)- Governu liu husi Reuniaun Konsellu Ministru, Kuarta (13/05/2026), aprova projetu proposta lei ne’ebé aprezenta hosi Ministra Finansas, Santina José Rodrigues F. Viegas Cardoso, hodi husu tan Orsamentu Retifikativu millaun 177 USD ba sustenta Orsamentu Jerál Estadu (OJE) 2026.

Ho aprovasaun ne’e, Governu halo alterasaun dahuluk Lei nú. 8/2025, loron 27 fulan-Novembru, kona-bá Orsamentu Jerál Estadu ba tinan 2026 (OJE 2026),

Proposta ne’e prevee ajustamentu ida ba OGE 2026 hodi hatán ba aumentu hosi folin kombustivel internasionál, relasiona ho konflitu iha Médiu Oriente, kustus ne’ebé mosu hosi ezersísiu hosi Prezidénsia Pro Tempore Komunidade País Lian Portugés (CPLP, sigla portugés) nian ne’ebé asume hosi Timor-Leste hafoin aprovasaun OJE 2026, nune’e mós despeza sira ne’ebé relasiona ho Rejiaun Administrativu Espesiál Oé-Cusse Ambeno (RAEOA).

Ho alterasaun ida-ne’e, montante konsolidadu hosi OJE 2026 aumenta maizumenus  millaun 101,1 USD, sa’e ba maizumenus  biliaun 2,39 USD. Aumentu ida-ne’e la’ós rezultadu reforsu transferénsias ruma hosi Fundu Petrolíferu, maibé liu-liu reajustamentu hosi fonte finansiamentu Estadu nian, liuhosi utilizasaun saldu jerénsia, saldu ne’ebé disponivel iha konta bankária  ne’ebé la efetiva (ne’ebé la uza), no mós reforsu hosi reseita doméstika sira.

Ministra Finansas, Santina José Rodrigues F. Viegas Cardoso,  ba Jornalista iha Palásiu Governu Díli hateten orsamentu retifikativu ne’ebé governu aprova no tau ne’e atu responde situasaun atuál ne’ebé dezafiante no mundu agora enfrenta.

“ Governu prepara hela para atu hodi orsamentu retifikativu por volta millaun 177 USD  ba Parlamentu Nasionál,” Ministra Finansas, Santida Cardoso hateten.

Nia hatutan tanba orsamentu retifikativu hetan ona aprovasaun husi Konsellu Ministru, Ministériu Finansa sei prepara atu finaliza lei ohin ka aban atu lori ba Parlamentu Nasionál.

Proposta orsamentu retifikativu ho objetivu mós atu hamenus impaktu ekonómiku hosi aumentu folin kombustivel internasionál, iha kontestu dependénsia maka’as ba importasaun, liuliu kombustivel no produtu ai-han, ne’ebé afeta diretamente kustu transporte, no mós inflasaun doméstika.

Tuir projesaun hosi Ministériu Finansa, maski iha aumentu iha folin kombustivel nian iha nivel internasionál, prevee katak média inflasaun anuál iha tinan 2026 sei sa’e ba 2,2%, kompara ho 1,2% iha tinan 2025, lahó aumentu ne’ebé signifikativu, tanba medida sira ne’ebé maka governu adota hodi estabiliza folin kombustivel.

Jornalista: Remigia Locatelli/Editór: Vito Salvadór