Governu Aprova Millaun 428,99 USD Ba Akizisaun Kombustivel Ba Sentrál Elétrika Hera no Betanu

Ezersisiu servisu iha Sentral Eletrika Hera. Imajen/Dok.EDTL

Díli, 26 Agostu 2026 (RAFA)-Tuir projetu ne’ebé aprezenta hosi Ministru Obras Públikas, Samuel Marçal, iha reuniaun Konsellu Ministrus, Kuarta-ne´e, Governu delibera hodi ratifika aktu sira ne’ebé autoriza despeza no desizaun hodi loke prosedimentu aprovizionamentu, liuhosi konkursu públiku, ba akizisaun kombustivel ne’ebé destina ba Sentrál Elétrika Hera no Betanu.

“Despeza ne’e iha valór másimu estimadu totál dolar amerikanu millaun 428,99 no fahe ba lote rua: maizumenus dolar amerikanu millaun 316,31 ba fornesimentu maizumenus litru millaun 372,5 kombustivel ba Sentrál Elétrika Hera no maizumenus dolar amerikanu millaun 112,67 ba maizumenus litru millaun 129,9 ne’ebé destinadu ba Sentrál Elétrika Betanu.” RAFA sita komunikadu.

Prosedimentu ne’e ho objetivu atu garante kontinuidade fornesimentu kombustivel hahú hosi fulan-janeiru 2027 no, nune’e, garante operasaun hosi sentrál elétriku rua no produsaun eletrisidade iha nasaun ne’e, hafoin termina kontratu fornesimentu atuál sira, ne’ebé marka ona ba fulan-dezembru 2026.

Kontratu tinan tolu ne’e ho objetivu mós atu fornese estabilidade boot liu iha fornesimentu, fasilita jestaun ba rezerva kombustivel sira no permite atu hetan folin sira ne’ebé vantajozu liu.

Jornalista: Cristina Ximenes