Governu Aprova Instrumentu Legál Ba Prosesu Rekrutamentu Kadetes PNTL Na’in-750

Ministru Interiór, Francisco da Costa Guterres. Foto/Rafa.tl

Díli, 03 Juñu 2026 (RAFA.TL)– Ministru Interior (MI), Francisco da Costa Guterres, hateten Governu aprová ona instrumentu legál ida kona-bá prosesu kontinuasaun hodi hetan numerú rekrutamentu Polisia Nasionál Timor-Leste (PNTL)  na’in-750 nune’e  prosesu rekturamentu bele hahú ona.

“Ho instrumentu legál ida Konsellu Ministru aprová, ohin, otomatikamente ita bele hahú halo rekrutamentu ba kadetes foun na’in-750,” Ministru Interiór Francisco da Costa Guterres ba jornalista sira iha Palásiu Governu, Kuarta (03/06/2026).

Membru Governu ne’e informa  ekipa juri forma hotu ona, sekretariadu, komisaun fiskalisazaun no monitorizasaun  iha hotu ona no ekipa juri husi ra- liur na’in-haat, husi rai-laran na’in-tolu, PNTL na’in-rua ho Funsaun Públiku na’in -ida.

Iha Reuniaun Konsellu Ministrus, Kuarta  (03/06/2026), aprova projetu Rezolusaun Governu, ne’ebé aprezenta hosi Ministru Interiór, Francisco da Costa Guterres, kona-ba definisaun nesesidade anuál hosi pesoál ne’ebé sei rekruta ba Polísia Nasionál Timor-Leste (PNTL) iha tinan 2026.

Rezolusaun Governu nian estabelese ba 350 númeru vaga adisionál ne’ebé sei rekruta hosi PNTL iha tinan 2026, ne’ebé aumenta ba vaga 400 ne’ebé antes ne’e aprova ona ba admisaun iha Kursu Formasaun Ajente, hodi aumenta totál vaga 750.

Husi vaga sira ne’ebé prevee ona, 400 destina ba polisiamentu jerál ne’ebé asegura hosi Komandu Munisipál sira no 350 ba reforsu Unidade Espesializada no Rezerva PNTL nian, maka hanesan Unidade Polísia Marítima, Unidade Patrullamentu Fronteira no Unidade Espesiál Polísia.

Medida ida-ne’e ho objetivu atu hametin kapasidade operasionál PNTL nian atu hatán ba nesesidade seguransa nasionál, hodi konsidera dezafiu sira ne’ebé relasiona ho prosesu eleitorál sira ne’ebé sei mai, protesaun fronteira no Timor-Leste nia Prezidénsia ba ASEAN iha tinan 2029.

Jornalista: Zita Menezes/Editór: Vito Salvadór