Governu Aprova CN-CAT Ba Prevensaun no Kombate Rede Transnasionál Fraude Finanseira Dijitál

Reuniaun KOnsellu Ministru iha Palásiu Governu, Kuarta 26 Agostu 2026.

Díli, 26 Agostu 2026 (RAFA)- Governu liuhosi Reuniaun Konsellu Ministrus, Kuarta-ne´e, aprova projetu Dekretu Governu hodi regula Sentru Nasionál ba Koordenasaun, Avaliasaun no Kombate Ameasa Transnasionál (CN-CAT) ne’ebé prevee ona iha Planu Nasionál Integradu ba Prevensaun no Kombate Rede Transnasionál Fraude Finanseira Dijitál, ne’ebé hetan apoiu husi Plataforma Burla Online (SCAM), Kriminalidade Sibernétika Organizada no Tráfiku Umanu, ba períodu 2026 to’o 2031.

Iha komunikadu ofisiál husi Portal Governu ne´ebé RAFA asesu hatete, CN-CAT funsiona ho tutela direta husi Primeiru-Ministru no ninia misaun mak atu garante koordenasaun inter-institusionál, avaliasaun integradu ba ameasa sira, no mós apoiu ba foti desizaun estratéjiku Governu nian iha prevensaun no kombate ba ameasa transnasionál sira ne’ebé bele afeta seguransa nasionál, soberania dijitál, estabilidade ekonómika, integridade sistema finanseiru nasionál ka intereses estratéjikus Estadu nian. Ameasa sira-ne’e inklui fraude finanseira dijitál, plataforma burla online, kriminalidade sibernétika organizada, entrada no estadia ilegál hosi sidadaun estranjeiru sira iha territóriu nasionál, no mós tráfiku umanu.

“Sentru ne’e halibur reprezentantes hosi entidade prinsipál sira ne’ebé iha responsabilidade iha área hirak ne’e no  koordena hosi Diretór-Jerál Servisu Nasionál Intelijénsia Estratéjika nian, ne’ebé hetan apoiu hosi Diretór Polísia Sientífika Investigasaun Kriminál. Entre ninia funsaun prinsipál sira mak avaliasaun permanente ba ameasa sira, elaborasaun relatóriu no alerta estratéjiku ba Primeiru-Ministru, fahe informasaun entre entidade partisipante sira, koordenasaun téknika no planeamentu ba asaun konjunta sira, nune’e mós akompaña implementasaun medidas ne’ebé prevee ona iha Planu Nasionál.” RAFA sita komunikadu.

CN-CAT nia atividades la altera kompeténsias hosi entidade sira ne’ebé halo parte iha nia. Atuasaun CN-CAT mós la fó ba nia podér investigasaun kriminál ka diresaun operasionál nian. Ministériu Públiku mantein nafatin kompeténsia atu dirije investigasaun kriminál.

Jornalista: Juvinal Cabral dos Santos