Governu Apela Ba Sidadaun Hotu Atualiza Kartaun Eleitoral Ba Biométriku

Ministru Administrasaun Estatál , Tomas do Rosário Cabral.

Díli, 30 Setembru 2026 (RAFA) —Ministru Administrasaun Estatál (MAE), Tomas do Rosário Cabral, apela ba sidadaun hotu atu atualiza sira-nia kartaun eleitorál ba sistema biométriku hodi garante sira-nia direitu vota iha eleisaun prezidensiál no parlamentár.

Ministru Tomas do Rosário Cabral hato’o mensajen ne’e liu husi jornalista sira, iha Díli, Kuarta ne’e, hodi afirma tan,  prosesu resensiamentu biométriku sei prepara atu garante dadus eleitorál sidadaun sira atualizadu.

Dadaun ne’e STAE prepara ona mákina hotu-hotu, agora  sira prepara hela resensiamentu biométriku. Tanba iha númeru eleitór sira ne’ebé lakon vida, muda hela fatin, no seidauk atualiza.

“Se ema lahalo resensiamentu no atualiza nia kartaun, sei lakon direitu atu vota, tanba nia naran sei la tama iha lista,” Ministru  Tomas do Rosário Cabral hateten.

Nia mós husu ba sidadaun sira ne’ebé atualmente servisu iha Díli, maibé rejistu eleitorál sira iha munisípiu seluk, atu aproveita oportunidade resensiamentu atu atualiza sira-nia kartaun eleitorál.

Medida ne’e, tuir nia, bele evita sidadaun sira tenke viajan fila-fali ba munisípiu orijen bainhira eleisaun hala’o.

Ministru ne’e esplika katak, depois eleisaun prezidensiál, sei hala’o mós eleisaun munisipál. Durante prosesu eleisaun munisipál, sidadaun sei vota tuir lista eleitorál no total eleitór iha kada munisípiu.

Tomas do Rosário Cabral esplika STAE nu’udar instituisaun públika ne’ebé iha autonomia iha administrasaun prosesu eleitorál.

Bainhira kalendáriu ofisiál ba resensiamentu no atualizasaun kartaun eleitorál sai, informasaun sei públika liuhusi órgaun komunikasaun sosial, atu fasilita sidadaun sira hetan informasaun kona-bá fatin no sentru resensiamentu.

Kona-bá eleisaun prezidensiál 2027, Ministru ne’e esplika  kalendáriu ofisiál sei depende ba dekretu husi Prezidente  Repúblika.

Tuir previsaun kalendáriu eleisaun, eleisaun prezidensiál bele hala’o iha fulan-Marsu ka fulan-Abríl tinan 2027, enkuantu tomada de posse Presidente Repúblika foun sei hala’o iha  loron 20 fulan-Maiu tinan 2027.

Jornalista : Remigia Locatelli