Governu Aloka 40,000.00 USD Ba Preparasaun Atleta Na’in-13 husi Modalidade Hitu Ne’ebé Sei Kompete iha Asian Games 2026

Atleta Timoroan na'in-13 husi modalidade hitu ne’ebé prontu kompete iha Asian Games Aichi–Nagoya, Japaun 2026.

Díli, 04 Agostu 2026 (RAFA.TL)- Ministériu Juventude, Desportu, Arte no Kultura (MJDAK) aloka orsamentu ho montante 40,000.00 USD ba preparasaun durante loron 42 iha Otel Audian ba atleta na’in-13 husi modalidade hitu ne’ebé sei kompete iha Asian Games Aichi–Nagoya, Japaun 2026.

Iha serimonia lansamentu ba preparasaun ne´ebé Governu hamutuk ho Konfederasaun Desportu Timor-Leste (CDTL) no Komité Olímpiku Nasional Timor-Leste (CONTL) ba modalidade desportiva hitu hanesan Taekwondo, Atletizmu, Swimming, Voley Praia, Halterofilismo, power lifting no Archeri.

Prezidente kompetisaun nivel altu nu’udar Diretór Jerál Desportu, David Tomas de Deus, Segunda-ne’e, informa atleta hamutuk na’in-13 husi modalidade hitu, ne’ebé mak halo preparasaun atu ba partisipa iha eventu internasionál ne’e.

“Atleta sira ne’ebé ita lori mak konsentra hamutuk iha Otél Audian, hahú husi Segunda-ne’e to’o loron-14 fulan-Setembru, sura hamutuk loron 42. Husi atleta na’in-13 ne’e, atleta na’in-hitu mak konsentra iha Otél Audian hodi halo preparasaun, enkuantu na’in-neen hala’o hela formasaun iha rai-liur,” David Tomas de Deus hateten.

Timor-Leste nia atleta iha modalidade Taekwondo halo preparasaun iha korea, swimming halo preparasaun iha Filipina, Halterofilismo no archeri halo preparasaun iha Tailándia, Wresting halo preparasaun iha Tajikistan.

Diretór ne’e subliña governu la fó alvu espesifiku ba delegasaun Timor-Leste tanba eventu ne’e envolve partisipasaun husi nasaun 45 iha kontinente Ázia, ne’ebé hotu-hotu mai ho atleta sira ho nivel kompetisaun aas tanba ne’e nia enkoraja atleta sira esforsu atu hatudu dezempeñu di’ak no lori naran nasaun ho dignidade iha eventu internasionál ne’e.

Iha fatin hanesan, Prezidente Komfederasun Desportu Timor-Leste, Afranio Xavier, hatutan kompetisaun refere la’ós de’it atu manan medalla, maibé oinsa hatudu disiplina no kapasidade nasaun iha jogu nivel internasionál.

“Imi atleta sira mak reprezentante nasaun atu hasa’e bandeira iha palku internasionál, tanba ne’e eventu ida-ne’e importante atu prepara imi ho di’ak atu hatudu rezultadu ne’ebé mak di’ak liu,”  Afranio Xavier hateten.

Nia husu atleta sira atu kria unidade, tanba susesu sei mai husi espiritu serbisu hamutuk entre atleta no treinadór no ofisiál sira ho obejetivu ida de’it, ne’ebe mak reprezenta nasaun ho dignidade.

Diretór Jerál Servisu Koperativu, João dos Santos, ne´ebé reprezenta MJDAK hateten preparasaun ba atleta la’ós iha lansamentu ohin mak atu halo preparasaun, maibé preparasaun ba modalidade sira atu ba partisipa eventu internasionál ne’e antes tiha ona.

“Ohin, ita formaliza  para oinsá atu prepara di’ak liután iha semana hirak nia laran, atu ita ba partisipa iha ASEAN Games ho di’ak,” João dos Santos tenik.

Governu liu husi MJDAK kontinua apoiu orsamentu ba atleta sira ne’ebé halo preparasaun atu ba partisipa iha  nivel rejionál no internasionál.

Maske preparasaun ho tempu badak, maibé fiar katak modalidade balun ne’ebé ba halo preparasaun iha rai-li’ur no balun ne’ebé halo preparasaun iha rai-laran, bele ba kompete ho di’ak iha eventu refere.

Vise Prezidente Komite Olimpiku Nasionál Timor-Leste, Vincente Carvalho, hateten rejistrasaun ba by number no by name finaliza ona, hein atu desloka ba partisipa eventu refere.

Asian Games ba dala-20, ne’ebé sei realiza iha Aichi–Nagoya, Japaun, hahú husi loron 19 fulan Setembru to’o loron 4 fulan Outubru 2026.

Jornalista: Davilio Valdamir