Governu Agradese Povu Ba Solidariedade Durante Lutu Nasionál Ba Sauzodu Lú-Olo

Ema rihun ba rihun iha Dili fó sentidu omenajen ikus ba Saudozu Franciscu Guterres Lú-Olo ho matan-been. Imajen/Foti husi Pájina Ofisiál Francisco Guterres Lú-Olo

Díli, 29 Juñu 2026 (RAFA.TL)- Governu agradese ba povu no entidade hotu iha Timor-Leste  ne’ebé ho domin no solidariedade hola parte iha prosesu hotu to’o lutu nasionál ba Saudozu Francisco Guterre Lú-Olo to’o haloot iha Jardim dos Heróis da Pátria Metinaro.

Vise-Primeiru Ministru, Ministru Koordenador Asuntus Sosiais no Ministru Dezenvolvimentu Rural no Habitasaun Komunitáriu, Mariano Assanami Sabino, liu husi konferénsia ba imprensa, iha Palásiu Governu, Segunda (29/06/2026), hato’o agrasdese ba povu Timor-Leste, instituisaun públiku no privadu sira, juventude sira ne’ebé maka hola parte iha falesimentu Prezidente Asembleia Konsitituente, eis-Prezidente Parlamentu Nasionál, no mós Eis-Prezidente Repúblika Francisco Guterres Lú-Olo to’o serimónia funebre ikus iha jardim dos Heóis da Patria Metinaro.

Partisipasaun boot husi povu iha serimónia funebre no omenajem oi-oin iha rai-laran, no mós Timoroan sira ne’ebé maka iha diaspora, hatudu katak, povu rekoñese kle’an ba legadu husi ema ida ne’ebé maka dedika nia moris tomak ba luta independénsia no servisu ba Timor-Leste

‘’Ha’u hakarak agradese ho maneira espesial ba forsa defeza, autoridade no seguransa, konfesoins relijiozu sira, profisionál sa’ude sira, funsionáriu públiku sira, órgaun komunikasaun sosiál sira, órgaun sosiedade sivíl sira, no instituisaun privadu sira ne’ebé ho dedikasaun tomak, no ho espiritu misaun kontribui ba serimónia ho dignidade ordem no respeitu,’ Vise-Primeiru-Ministru Mariano Asanami Sabino hateten.

Governante ne’e renova hikas nia kondolénsia kle’an ba familía enlutada no agradese ba povu Timoroan hotu-hotu tanba solidariedade no ezemplu sivilizmu ne’ebé oferese ona ba rai Timor liu husi asaun ne’ebé maka hatudu durante iha Lutu Nasionál.

Assanami mós agradese ba povu Timor-Leste tomak ne’ebé maka respeita tebes luta ne’ebé maka governu dekreta ba Saudozu Lú-Olo nia falesimentu durante semana ida iha teritóriu nasionál no ne’e hatudu katak sidadaun Timor-Leste valoriza duni lutadór sira nia sakrifisiu, liu-liu Saudozu Francisco Guterres Lú-Olo ne’ebé fo nia vida tomak ba liberdade nasaun ne’e nian.

‘’Ba sidadaun hotu-hotu ne’ebé presta sira nia omenajem, respeita periodu lutu nasionál, no hamutuk iha tempu susar ida ne’e, ha’u hato’o ha’u nia rekoñesimentu no  respeito tomak, hanesan nasaun ida ita hatene katak oinsá atu fo onra ba ita nia ema sira, ne’ebé fo sira nia vida tomak ba nasaun,’’ tenik Assanami.

Vise-Primeiru-Ministru ne’e subliña Saudozu Francisco Guterres Lú-Olo  fzsikamente la hamutuk ona ho povu,  maibé Saudozu nia memória no legadu sira nafatin iha povu tomak nia fuan, no sei haktuir nafatin husi jerasaun kontinuador sira, liu-liu sakrifisiu sira ne’ebé Saudozu halo ona ba rai ida ne’e durante iha luta libertasaun nasionál.

Saudozu nia misaun no vizaun sira, kontinua inspira sidadaun sira, liu-liu jerasaun kontinuadór sira hodi hari dame, unidade nasionál, liu-liu ba dezenvolvimentu Timor-Leste nian.

Jornalista: Remigia Locatelli/Editór: Vito Salvadór