GASC Koordena ho Arkedioseze Díli Ba Kontinuasaun Konstrusaun Igreja Ai-mutin

Kondisaun infraestrutura Igreja Ai-mutin, Díli.

Díli, 24 Setembru 2026 (RAFA)– Gabinete Apoiu Sosiedade Sivíl (GASC) halo ona koordenasaun ho Arkedioseze Metropolitana Díli ba kontinuasaun konstrusaun Igreja Parokia São José  Ai-mutin hodi bele finaliza tuir parte hotu nia interese.

Koordenadór GASC, Joaquim Freitas, Kinta-ne’e, bá Jornalista sira iha Díli, hateten tanba GASC maka halo jestaun ba fundu transferénsia, maibé la’ós direitamente, no se projetu konstrusaun Igreja Ai-mutin, jere direita husi  GASC, oras ne’e bele lao ona. Maibé tanba GASC halo parseiria ho dioseza tolu, bá  konstrusaun Igreja hotu-hotu responsabilidade husi Dioseza Díli tanba ne´e nia prosesu  tenke liu husi koordenasaun no kooperasaun atu bele hetan intendimentu ida ba finalizasaun.

“Konstrusaun Igreja Ai-mutin sai tiha ona icon, fatin ida ne’ebé maka ema hotu-hotu husu, maibé  ami hakarak hatete de’it katak ami to’o ona iha faze ne’ebé akordu ho Dom Virgílio Cardeal do Carmo da Silva, SDB   para obriga  bá oioin sira maka responsabiliza fali,” Joaquim Freitas hateten.

Kordenadór GASC ne’e hatutan, dadaun ne’e Dom Virgílio Cardeal do Carmo da Silva, SDB deside fó fali bá kompaña balu atu halo levantamentu, maibé montante orsamentu ne’ebé atu halo Igreja ne’e to’o termina seidauk serteza. Tanba ne’e, tuir nia katak, presiza tékniku atu akumula dadus  bá finalidade projetu Konstrusaun Igreja ai-mutin.

Nia dehan, bá dezafiu ne’ebé uluk konstrusaun  Igreja refere hasoru, liu-liu  akontese ema ho sufisiensia fó  ona responsabilidade  sira,  atu nune’e  bele iha progresu to’o iha gastu 3000.000,00 USD ne’ebé maka Governu prevee ona mai to’o iha tinan 2023.

GASC sei hato’o  relatóriu bá Primeiru Ministru Kay Rala Xanana Gusmão, molok Governu hanoin atu prevee tan osan, maibé tenke kontinua ho kooperasaun ho Dioseza Díli.

Fó hanoin fali katak, lansamentu fatuk-inan bá Igreja Ai-mutin husi Primeiru-Ministru tempu ne’ebá, Rui Maria de Araújo, ho konseitu kombinasaun kulturál no modernu, ne’ebé sei akomoda sarani besik 1,200, ohin loron, ninia konstrusaun nunka terminá, mezmu iha tinan 2019 liubá halo tiha ona pagamentu ba “mão de obra” milaun 2,5 USD.

Jornalista: Marcelino Tomae