g7+ Aprezenta Relatóriu Servisu Ba PM Xanana

PM Xanana simu relatóriu servisu husi g7+, Kinta 30 Jullu 2026.

Díli, 30  Jullu  2026 (RAFA.TL)- Organizasaun intergovernamentál  g7+, Kinta-ne’e, halo enkontru ho Primeiru-Ministru Xanana Gusmão, hodi aprezenta sira-nia relatóriu servisu.

“Ha’u mai husi g7+ mak husu ha’u mai para sira informa saida mak g7+ halo to’o agora, ne’ebé ohin sira informa mai ha’u katak g7+ iha nia misaun ida mós atu ba akompaña haré tuir elisaun la’ós de’it iha nasaun sira membru g7+ mais iha rai seluk ne’ebé ita bele ba,” PM Xanana Gusmão informa ba jornalista sira.

Xefe ezekutivu ne’e  haktuir iha relatóriu g7+ nian katak  g7+ antes ne’e akompaña  ona São Tome Prinsipe no Solomon Island   ba eleisaun prezidensiál, no eleisaun parlamentár, klaru iha  eleisaun hotu-hotu sempre  iha problema uituan, mais iha ne’ebá buat hotu  la’o di’ak.

“Sira fó relatóriu ida boot tebes ha’u la bele lee hotu, mais hodi hatudu katak g7+ nia papél iha mundu ema komesa  rekoñese ona,”hatete PM Xanana Gusmão.

g7+  nia papél mak atu halo observasaun, kurizi  no fó solusaun ba nasaun sira ne’ebé iha kestaun estadu frazíl ka mosu konflitu no  g7+ sei buka nafatin defende reforma tuir konseitu seguransa Organizasaun Nasoen Unida (ONU) nian.

PM Xanana adianta  iha loron 29-30 fulan-Setembru  2026 iha Zenebra iha diálogu ida kona- ba paz  g7+ mós sei ba partisipa hodi fahe esperiénsia oinsá mak g7+ hanesan organizasaun Governamentál ida iha paízes ne’ebé estadu sei fraku iha konflitu laran no hakotu ona konflitu bele hadi’a nei-neik hodi bolu atensaun ba mundu katak diálogu, mediasaun no kooperasaun ne’ebé profisionál ho moral ho solidariedade bele hadi’a prosesu paz iha mundu.

Jornalista: Zita Menezes