Noticias

Funsionáriu Bombeiru Na’in-408 Ezije Direitu Alimentasaun Ne´ebé Governu Seidauk Halo Pagamentu Durante Fulan-Hitu

todayNovember 16, 2026 41

Background
share close

Díli, 16 Novembru 2026 (RAFA)— Funsionáriu Korpu Bombeiru Timor-Leste hamutuk na’in-408 ezije sira-nia direitu alimentasaun ne’ebé Governu seidauk halo pagamentu durtante fulan-hitu nia laran ona.

Liuhusi konferénsia imprensa, Segunda-ne’e, iha Díli, portavós korpu Bombeiru Timor-Leste, Manuel dos Reis, hateten funsionáriu Bombeiru Timor-Leste tomak halibur hamutuk ezije direitu ba osan alimentasaun ne’ebé durante fulan-hitu laiha.

“Ami nia objetivu ohin mai iha ne’e, Bombeiru Timor-Leste, ami atu ezije de’it kona-bá osan ransu ne’ebé mak ami Bombeiru husi munisípiu hotu-hotu hahú husi fulan-Maiu to’o mai oras ida-ne’e, Governu seidauk selu ami,” hatete Manuel dos Reis.

Antes ne’e, Bombeiru Munisípiu Baucau halo konferensia imprensa no hato´o karta ba parte relevante, maibé seidauk iha informasaun.

Karta segundu submeter iha loron 27 fulan-Outubru 2026, to’o oras ne’e la iha rezultadu.  Nune’e, funsionáriu korpu Bombeiru sira fó ultimatu katak ohin tenke responde ba sira nia ezijénsia, tanba agora sira la \iha ona osan atu tein han hodi halo servisu.

“Ami sei la hapara ami sei kontinua to’o Primeiru Ministru tanba orsamentu iha oras ne’e sira nonok hela, atu uja ne’e ba halo saida, iha ne’ebá bele foti montante ida ba montante seluk ida ne’e atu ba ransu de’it labele tanba saida ne’e mak ami ezizi,” tenik nia.

Iha fatin hanesan funsionáriu Bombeiru, Nazario Soares haktuir prosesu la’o kleur ona, depois hatama ona karta maibé seidauk iha resposta. Sira hala’o ona knaar maibé direitu la hetan.

“Ami Bombeiru Timor-Leste marka prezensa fatin ida ne’e para atu hateten katak, ami la mai julga ami nia lideransa maibé ami husu sira tenke rezolve ami nia problema ne’e emidiata loron ida ohin ne’e tenke fó rezultadu ba ami, sé hateten katak osan ne’e iha tenke prosesu ne’e la’o sé la iha mós tenke esplika mai ami, razaun ne’e oinsá. Tanba ita labele halimar ami kumpri ona ami nia dever tuir Leí estatutu funsaun públika artigu 49° ne’ebé dever jerál ami halo hotu ona agora ami husu de’it ami nia direitu,” dehan Nazario Soares.

Reprezentante Bombeiros husu Sekretáriu Estadu Autoridade Protesaun Sivíl no Prezidente Autoridade Protesaun Sivíl atu tur hamutuk nune’e ohin loron bele solusiona problema.

To’o notisia ne´e publika RAFA seidauk bele halo konfirmasaun ho autoridade relevante liu-liu Sekretáriu Estadu Protesaun Sivíl no prezidente Autoridade Protesaun Sivíl tamba sira iha ona konkordansia atu hasoru malu hodi solusiona molok ko’alia ba media.

Jornalista: Juvinal Cabral dos Santos

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!