Fundasaun Mahein Konsidera Estadu Laiha Mekanizmu Rigorozu Kontrola Atividade Scam Call Centre

PNTL kaptura sidadaun Xina na'in-14 envolve iha atividade ilísitu Scam call centre iha Comoro, Segunda-kalan, 28 Setembru 2026.

Díli, 29 Setembru 2026 (RAFA)- Fundasaun Mahein (FM) konsidera autoridade seidauk iha mekanizmu rigorozu hodi kontrola sidadaun estranjeiru sira ne’ebé envolve atividade ilísitu Scam Call Centre iha Timor-Leste no husik atividade krime organizadu ne’e kontinua mosu fali iha fatin tuan ho autór ne’ebé hanesan.

Preokupasaun ne´e hato´o husi Diretór Ezekutivu Fundasaun Mahein Nelson Belo ba RAFA iha nia knaar fatin Hudi Laran, Tersa-ne’e.

“Investiga mós sira ne’ebé fasilita ne’e, ne’ebé ita bolu lokál fasilitator maibé se la halo ne’e, fó mensajen bá sira katak mekanizmu rigirozu la iha, mekanizmu kontrolu la iha, ita bele halo ida-ne’e sai fali ba halo fali iha ne’ebá. Ne’ebé hahú husi Migrasaun, aviasaun, PCIC, Servisu Nasionál Intelejensia (SNI),  DSIK to’o Ministériu Públiku (MP) no Tribunál ita tenke iha Komandu konjunta ida nia okos,” hatete Diretór Ezekutivu Fundasaun Mahein Nelson Belo.

Nia esplika, faktus hatudu bei-beik katak sidadaun Xina sira ne’ebé sai husi Tribunál, sei kontinua nafatin halo atividade ilísitu iha fatin foun ka fatin tuan ne’ebé uluk polísia sobu ona. Ne’e hatudu katak kontrolu sei fraku tebes. Tanba ne’e, Fundasaun Mahein rekomenda atu Estadu tenke hasa’e ninia polítika ne’ebé mais rigorozu.

“Estadu tenke hasa’e ninia polítika ida ne’ebé mais rigirozu, no Fundasaun Mahein nia rekomendasaun husu Konsellu Ministru prodús rezolusaun ba Komandu konjunta ne’ebé mak nia mandatu ba Komandu konjunta ne’e ba detensaun rigiroju, buska rigirozu, ba prosesu iha Ministériu Públiku no sira ba asuntu Judisiál ne’e tenke rigirozu”, nia dehan.

Entretantu, Fundasaun Mahein husu atu instituisaun Estadu hotu tenke iha koordenasaun no uniformalizasaun iha asaun ba kombate kontra krime organizadu. No atu asegura katak hahú husi Migrasaun, Aviasaun, PCIC, SNI, DSIK to’o Ministériu Públiku no Tribunál tenke servisu hamutuk iha Komandu Konjunta ida nia okos.

Jornalista: Juvinal Cabral/Joao Carlos