Ouvir RAFA Ritmo, Voz e Coração de Timor
Díli, 28 Outubru 2026 (RAFA)- Diretór Ezekutivu Fundasaun Mahein, Nelson Belo, konkorda atu re-ativa atividade arte-marsiál, maibé tenke kria kondisaun la’ós halo deit regra, maibé laiha investimentu real ba joven arte-marsiál sira.
Fundasaun Mahein mós husu atu governu hapara ona plitizasaun no utiliza arte-marsiál hanesan instrumentu politiku, tanba bainhira loke ka taka ne’e la prevene konflitu, maibé importante liu kria kondisaun.
Diretór Ezekutivu Fundasaun Mahein husu Governu tenke iha programa hafoin bele muda arte-marsiál ba iha modalidade desportu, atu nune’e iha loron boot iha torneiu ba joven sira nune’e dezenvolve an ba kompetisaun la’ós ba violéntu.
“Leí ne’e kria para intensaun polítiku ruma ne’ebé mak ba dezenvolvimentu nasionál, ha’u hanoin ita bele halo integrasaun juventude ne’ebé violéntu ba iha juventude ne’ebé talentu ba modalidade desportu, maibé Leí ne’e kria para iha intensaun polítiku seluk ha’u hanoin konflitu ne’e sei la hotu de’it. Ha’u hanoin atu implementa loloos Leí ne’e mós sei problema boot haree ba dadaun ne’e ita nia Tribunál mós naksobu husi tutun mak tun mai, ida ne’e sinál ida ita bele implementa Leí ne’e ka lae,” tenik nia.

Hatan ba kestaun ne´e, Ministru Interiór Francisco da Costa Guterres ba joranlista sira iha Palásiu Governu hatete, re-ativa arte-marsiál sei hamosu Leí ne’ebé rigor, atu individuu ne’ebé halo problema nia responsabilidade mesak la temi organizasaun.
“Ha’u seidauk halo komentáriu barak ami hein hela dekretu Leí ne’e atu mai aprova iha konsellu ministru atu kria komisaun, iha ona sekretáriadu tranjitoria ha’u hanoin depois mak imi sei ba ko’alia, mais iha Leí ne’e fó loron 90, depois ita estabelese regras hotu-hotu para ita hahú. Ne’ebé ha’u hanoin desizaun ida uluk konsellu ministru nian kontinua la’o to’o kuandu tama ona efeitu implementasaun Leí ne’e to’o 90 dias ita tama ona regras foun,” hatete Ministru Francisco da Costa Guterres.
Governante ne´e esplika, Leí ne’e regra kompletu iha sansaun ate tama kadeia, no responsabilidade liga ho treinador. Ema ida mak halo tenke hatene husi sentru ne’ebé, hotu-hotu tenke asume responsabilidade.
Jornalista: Juvinal Cabral dos santos
Written by: RafaFM
Fundasaun Mahein husu Governu Kria Kondisaun Molok Re-Ativa Arte-Marsiál
todayNovember 20, 2026 11 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt