FRETILIN Sei Konvoka Komisaun Polítika Nasionál hodi Análize Situasaun Partidu Nian

Imajen/dok.Espesiál

Díli, 29 Juñu 2026 (RAFA.TL) – Sekretáriu-Jerál Partidu FRETILIN, Mari Alkatiri ba Rafa.tl, Segunda ne’e (29/06/2026),  hateten katak sei konvoka Komisaun Polítika Nasionál (CPN) iha loron 15 nia laran hodi halo análize ba situasaun interna partidu nian hafoin prezidente partidu, Francisco Guterres Lú-Olo mate.

“Hafoin loron 15, ha’u sei konvoka Komisaun Polítika Nasionál hodi análize senáriu sira no estatutu hosi re-estruturasaun partidária ne’ebé la’o daudaun, no tuirmai konvoka CCF hodi foti desizaun sira, signifika atu aselera ka mantén kalendáriu ba prosesu ne’ebé lori ba kongresu,” Mari Alkatiri  hateten.

Alkatiri lakohi fó komentáriu liután kona-bá prosesu espesifikamente kona-ba liña tempu ba potensiál kongresu estraordináriu partidu Frente Revolusionáriu Timor-Leste Independente (FRETILIN), no esplika katak ne’e hanesan “asuntu ne’ebé labele trata ho kmaan”.

Nia subliña nesesidade atu kompleta prosesu reorganizasaun partidu nian, partikularmente iha baze. FRETILIN nia estatutu sira estipula katak “iha kazu inkapasidade permanente, Sekretáriu-Jerál sei asumi knaar sira nu’udar Prezidente FRETILIN nian durante períodu loron 90 no tenke konvoka Komité Sentrál, ne’ebé sei konvoka Kongresu estraordináriu ida.”

Maibé, ida-ne’e implika atu kompleta prosesu eleisaun iha baze, tanba datoluk rua hosi membru kongresu sira eleitu iha baze prosesu ne’ebé sei la’o hela no lidera hamutuk hosi Francisco Guterres Lú-Olo no Mari Alkatiri.

Mari Alkatiri antes ne’e kaer knaar nu’udar Prezidente FRETILIN konkorentemente durante períodu ne’ebé Francisco Guterres Lú-Olo hala’o kna’ar nu’udar Xefe Estadu (2017–2022). FRETILIN nia estatutu sira estipula katak Prezidente, hanesan Sekretáriu-Jerál, “hetan eleitu demokratikamente liuhosi eleisaun direta ka Kongresu Nasionál.”

“Kandidatura ba eleisaun direta lideransa nasionál FRETILIN nian (Prezidente no Sekretáriu-Jerál) submete liuhosi lista úniku, ne’ebé propoin hosi mínimu membru partidu 5.000 hosi Postu Administrativu no sub-rejiaun 60, ho mínimu membru na’in 30 kada Postu Administrativu no sub-rejiaun,” hateten iha estatutu.

Eleisaun direta lideransa nasionál FRETILIN nian “tenki hala’o pelumenus fulan ida molok Kongresu Nasionál.”

Entre aspetu sira seluk, estatutu sira ezije Prezidente tenke timoroan, membru FRETILIN, no ema ida ne’ebé “kaer ona kargu iha partidu nia estrutura sentrál sira pelumenus tinan lima (5) nia laran.”

Kandidatu sira tenke “livre hosi rejistu kriminál ruma tuir lei sira ne’ebé vigora iha teritóriu no la envolve iha violasaun direitus umanus, (…) la sujeita ba suspensaun ka iha investigasaun hosi autoridade kompetente sira, (…) no la envolve iha prátika sira korrupsaun, koluzaun, ka nepotizmu.”

Hatudu kompeténsia intelektuál no organizasionál, matenek polítiku, espíritu auto-sakrifísiu, no kapasidade organizasionál no lideransa nian maka entre lista naruk ho rekizitu 20 resin.

Susesór ba Francisco Guterres Lú-Olo ne’ebé kaer kargu ne’e durante tinan 25 tenki “disponivel atu serbí partidu, iha koñesimentu kona-ba polítika internasionál, sai hanesan figura ida ne’ebé proeminente liu iha partidu,” no mós “hatudu, tantu iha teoria no prátika, koezaun maka’as iha relasaun entre sira na’in rua no iha defeza FRETILIN no ninia prinsípiu sira.”

“La Nakdoko hasoru dezafiu ka difikuldade ruma bainhira defende FRETILIN ho nia prinsípiu sira,” hatutan tan estatutu sira.

Remata