FRETILIN Konsidera Vizita Prabowo Subianto Hanesan Forma Rekonsiliasaun

Prezidente Repúblika José Ramos-Horta halo enkontru bilateral ho Prezidente Repúblika Indonézia Prabowo Subianto iha Istana Merdeka-Jakarta, 27 fulan-Agostu 2026. Imajen/Espesiál

Díli, 03 Setembru  2026 (RAFA)- Membru Parlamentu Nasionál husi Bankada Frente Revolucionária de Timor-Leste Independente (FRETILIN), David Dias Ximenes Mandati, konsidera vizita Prezidente Repúblika Indonézia Prabowo Subianto mai Timor-Leste nu’udár forma rekonsialiasaun, respeitu malu no amigu di’ak entre Timor-Leste ho Indonézia.

Prezidente Repúblika, José Ramos-Horta, foin lalais ne’e, iha Jakarta, hasoru malu ho Prezidente Indonézia, Prabowo Subianto, hodi konfirma ninia prontidaun atu vizita Timor-Leste iha tinan ida-ne’e nia laran.

“Ha’u nia hanoin ita  di’ak, ita iha diplomásia di’ak apezar uluk ita iha buat ida funu laran, ita iha nakukun laran, hanesan Prabowo sira foin sa’e mai halo funu iha ne’e, prontu ne’e forma rekonsiliasaun, ita respeita malu, ita amigu malu, ita maun-alin ba malu. Agora forma konsilia ita nian konvive ba malu ne’e, ita tenke respeitu malu tiha mak ita ida-idak responsabiliza ba ita nia hahalok para ita nia amigu ba malu ne’e kontinua,” Deputadu David Dias Ximenes Mandati ba jornalista sira  iha Parlamentu Nasionál, Kinta-ne’e.

Deputadu Mandati hatutan, iha vizita Prezidente Repúblika Indonézia mai Timor-Leste nia parte mós hakarak atu husu eroi sira ne’ebé uluk mate iha funu laran to’o ohin loron seidauk hetan fali nia mate isin.

“La’ós dehan katak ita kondena malu ita la’o hamutuk ne’e lalika kondena malu, fó de’it ita nia ema sira ne’e mai apartir ita nia Prezidente Repúblika, ita nia kuadru superior sira, ita nia 12 Novembru, ita nia 10 Juñu, buat sira ne’e fó mai buat sira ne’e kontente ba malu ita kuandu amigu ba malu ita kuandu sente maun alin kuaNdu pontu sira ita la gosta kuandu rezolve tiha ida-ne’e mak halo ita bele respeita ba malu no konvive ba malu,”nia tenik.

Iha loron 27 fulan-Agostu 2026, Prezidente Repúblika José Ramos-Horta halo enkontru bilateral ho Prezidente Repúblika Indonézia Prabowo Subianto iha Istana Merdeka-Jakarta, informa katak iha tinan ida-ne’e Prezidente Prabowo Subianto sei vizita Timor-Leste.

Jornalista : Zita Menezes