FRETILIN Husu TIMOR GAP, E.P Deklara Valor Orsamentu Sosa Asaun 10% Osaka Gas iha Greater Sunrise

Membru Bankada FRETILIN Maria Angelica Rangel.

Díli, 29 Setembru 2026 (RAFA)- Bankada FRETILIN ezije ba Governu liu husi TIMOR GAP, E.P deklara valor orsamentu ba sosa Asaun 10%  empreza Osaka Gas Austrália nian iha Greater Sunrise tanba konsidera bele fó riskú ba finaseiru Estadu.

Membru Bankada FRETILIN Maria Angelica Rangel liu husi intervensaun iha reuniaun Plenária Tersa-ne’e iha Parlamentu Nasionál hateten TIMOr GAP, E.P sosa asaun Osaka Gas ne’e ho presu hira no presu ne’e bazeia ba evolusaun ruma sosa tán 10%, signifiká Timor-Leste nia share iha Greater Sunsrise nian 66,56%, no to’o agora seidauk deside kadoras mai Timor-Leste.

“Tanbasá mak ha’u ko’alia nune’e, tanba TIMOR GAP kada fulan sei selu cash crawl ne’e 4%, sé ha’u la sala aumenta tán ida-ne’e nia persentajen sa’e tán, selu kustu operasaun Sunrise Join Venture nian office no atividade sira seluk, kustu sira ne’e sura hotu ka lae hodi deside sosa tán ita nia share 10% husi Osaka Gas nian,” Deputada Maria Angelica Rangel kestiona.

Iha biban ne’e membru Bankada FRETILIN, Crisitina Yuri Rebelo dos Santos, sekunda katak asaun Governu sosa tán asaun 10% husi  Osaka Gas ne’e sei fó riskú ba finanseiru Estadu nian.

“Akizasaun ka  ita sosa share husi Osaka Gas Austrália 10% ho nune’e ita bele dehan katak ita nia asoens ne’e agora sa’e husi  56,56% ba 66,56%. Aumenta partisipasau ne’e bele aumenta mós benefísiu bai ta nia rai Timor-Leste maibé aumenta partisipasaun mós signifiká aumenta responsabilidade no riskú finanseira ba estadu,” Deputada Crisitina Yuri Rebelo dos Santos.

Membru Bankada FRETILIN sira  haktuir importante atu povu presiza hatene osan hira mak Timor Gap sei gasta ba sosa Asoen Osaka Gas husi Auatrália ho 10% no tanba uza osan estadu nian.

Hatán ba kestaun ne’e Vise Ministru Asuntu Parlamentár Adérito Hugo da Costa hatete nia parte la fó resposta ba Deputada Bankada FRETILIN nian tanba asuntu ne’e kestaun teknikú, no Ministériu Petroleu Rekrusu Minarai (MPRM) no instituisaun estatál TIMOR GAP,E.P  mak sei esplika ho detallu objetivu Timor-Leste sosa tán Asoen Osaka Gás ho 10%.

Antes ne´e, RAFA públika ona katak Prezidente no CEO TIMOR GAP, E.P, Rui Maria Alves Soares, konfirma katak TIMOR GAP sosa ona asaun 10% husi Osaka Gas iha kampu Greater Sunrise no tranzaksaun komersiál ne’e parte rua kompromente atu labele públika nia valór ba públika.

Jornalista : Zita Menezes