FONGTIL Solidariza Vítima Inséndiu iha Merkadu Taibesi no Husu Governu Mellora Kondisaun

Sasan vendedor sira-nian kauze la salva iha insendiu ne'ebé akontese iha Merkadu Taibesi, Sesta 25 Setembru 2026.

Díli, 26 Setembru 2026 (RAFA)- Forum Organizasaun Naun Governamentál Timor-Leste (FONGTIL) hato’o solidariedade ba vitíma insendiu iha Merkadu Taibesi ne’ebé lakon sira nia sasán.

FONGTIL husu governu liu husi Ministériu Obras Públika (MOP) no Eletrisidade De Timor-Leste (EDTL)  atu mellora kondisaun sira liga ho instalasaun fiu ne’ebé adekuadu tanba kauza husi inséndiu ne’ebé sempre akontese mai husi sirkuitu eletrisidade.

Direitór Ezekutivu FONGTIL, Inocêncio de Jesus Xavier ba RAFA, Sábadu-ne’e hatete, FONGTIL nia solidaridade klean ba vitíma sira ne’ebé hetan insendu iha Merkadu Taibesi, tanba sira lakon sira nia sasan.

“Parte EDTL haré instalasaun eletrisidade tenke tuir padraun  tanba dala barak populasaun sosa fiu Xina nian mai liga direita la hatene kona-bá nia risku ne’ebé ikus mai liña eletrisidade bele hamosu sirkuitu ka buat ruma mosu insendiu. Entaun ba oin lisaun ba governu liu-liu parte EDTL atu haré instalasaun eletrisidade iha merkadu sira,”  Direitór Ezekutivu FONGTIL, Inocêncio de Jesus Xavier.

Direitór Ezekutivu FONGTIL  ne’e mós husu ba ministériu relevante ne’ebé halo jestaun merkadu ne’e tenke koopera ho diresaun EDTL halo instalasaun foun ne’ebé tenke fiksu baze ba kritéria ka regra EDTL nian.

Tanba ne’e, lisaun ba hotu-hotu, ba sidadaun sira, no mós ba governu atu bele haree prevene hodi la estraga bens patrimoniál inklui sidadaun nia sasan rasik.

Direitór Ezekutivu FONGTIL ne’e haktuir, presiza investiga hodi hatene insendiu ninia motivu, prosesu administrativu la’o, investigasaun kriminál katak iha insendiu ruma la hatene.

Nia hatutan, tanba la hatene ahi han kalan, sirkuitu karik, ema tein mak haluha, entaun tenke iha duni prosesu investigasaun ida mak bele hatene faktu loloos husi akontesimentu ne’e.

Tanba ne’e mak parte polísia, EDTL halo nia servisu, no mós governu, SEATOU rasik haré ona mobiliza ema hamoos fatin refere, nune’e merkadu ne’e kontinua funsióna fila fali.

Entretantu, insendiu akontese iha Merkadu Taibesi iha loron 25 fulan-Setembru 2026.

Jornalista: Cristina Ximenes