Fokupers Rekomenda Aloka Millaun Ida USD iha OJE 2027 Ba Atende Asuntu Jeneru

Forum diskusaun ho tema “Refleta Progresu Fortalese Kompromisu Jéneru liuhosi Alokasaun Orsamentu Sensivel ba Jeñeru iha OJE 2027 : husi Kompromisu Politíka ba Impaktu Duravél”, Segunda 27 Jullu 2026.

Díli, 27 Jullu  2026 (RAFA.TL)- Fokupers rekomenda ba Governu atu aloka orsamentu ho montante entre millaun ida ka rua USD iha polítika Orsamentu Jerál Estadu (OJE) 2027 hodi bele atende asuntu jeneru.

Rekomendasaun Fokupers nian ne’e aprezenta husi Diretora Fokupers Domingas Afonso Amaral iha forum diskuzaun meza redonda nasionál ne’ebé hala’o iha Delta Nova, Díli, Segunda-ne’e.

Forum diskusaun ho tema “Refleta Progresu Fortalese Kompromisu Jéneru liuhosi Alokasaun Orsamentu Sensivel ba Jeñeru iha OJE 2027 : husi Kompromisu Politíka ba Impaktu Duravél”  ne’e nu’udar atividade ne’ebe prseria forte entre Fokupers ho Sekretária Estadu Igualdade (SEI).

Nia afirma iha momentu ida-ne’e hanesan momentu kritiká no krusiál atu bele lori fila-fali kompromisu sira ne’ebé Governu promete ona relasiona ho asuntu jeneru no sensivél sira.

Iha fatin hanesan Sekretária Estadu Igualdade, Elvina Sousa de Carvalho  hateten  onra boot ida ba nia  atu bele mai hamutuk iha forum meza redonda ida-ne’e hodi ko’alia kona-bá asuntu igualdade no sensivél sira.

“Tema ida ne’ebé mak ita haré iha ne’e  konvida ita atu haré fila-fali progreseu ne’ebé mak ita alkansa no iha tempu hanesan reforsa ita nia kompromisu atu asegura katak polítika no kada orsamentu jerál estadu ne’ebé Governu tenke investe no fó benefisiu justu ba feto, mane, labarik no ema difisiénsia inklui grupu vulneravél sira,” Sekretária Estadu Elvina Sousa de Carvalho hateten.

Prezidente Komisaun F trata asuntu Saúde Igualdade Jeñeru no Seguransa Sosiál,  Maria Gorumali Barreto hatete forum  ida-ne’e importante tanba bele halo diskusaun no fó ideia sira kona-bá planu asaun anuál ba violénsia bazeia ba jeñeru.

“Ita haré hamutuk kona-bá orsamentu sensivél ba jeñeru hodi responde ba iha situasaun ne’ebé mak ita iha, importante ba ita hotu hodi refleta kona-bá kompromisu Estadu Timor-Leste nian ba promosaun igualdade jeneru, kombate diskriminasaun no kombate violénsia iha sosiédade Timorense,” Deputada Maria Gorumali Barreto hateten.

Membru Parlamentu Nasionál ne’e afirma objetivu ba dezenvolvimentu sustentavél sei la atinje bainhira sei kontinua ezjiste dezigualdade jeneru.

Iha diskuzaun meza redonda ne’e panelista sira mai husi Ministériu Solidariedade Sosiál no Inkluzaun (MSSI), Prezidente Komisaun F Parlamentu Nasionál trata asuntu Saúde Igualdade Jeneru no Seguransa Sosiál, Fokupers no akademista ho reprezentante husi instituisaun oin-oin.

Jornalista : Zita Menezes