FIFA ho AFC Hahú Halo Inspesaun Ba Estádiu Munisipál Dili Atu Halo Reabilitsaun

Delegasaun FIFA ho AFC akompañia husi FFTL hahú halo inspesaun ba Estádiu Munisipál Dili, Kinta (27/11/2025). Imajen/Rafa.tl

DILI, RAFA.tl– Delegasaun ofisiál husi Fédération Internationale de Football Association (FIFA) no Asian Football Confederation (AFC), Kinta (27/11/2025), halo inspesaun direta ba Estádiu Munisipál Dili hodi haré besik kondisaun sira, fatin tur ba bainaka no adeptus sira (tribun), ho fatin ba mídia sira nian, molok halo reabilitasaun tuir kontratu ne’ebé Federasaun Futeból Timor-Leste (FFTL) estabelese ho Governu Timor-Leste.

Notísia Relevante: Governu ho FFTL Asina MoU Ba Transferénsia Uzu Estádiu Munisipál Dili Durante Tinan-25

Diretór Relasaun Internasional no Parseiru Dezenvolvimentu FFTL, Jánio Tilman hatete, tinan oin  (2026) sei halo reabilitasaun ba Estádiu Munisipál Díli, tanba AFC ho FIFA nian katak estádiu Dili ne’e seidauk tuir padraun FIFA nian.

Inspesaun ne’ebé halo husi AFC ho FIFA, akompaña husi FFTL liuhosi Diretór administrasaun ne’ebé haré ba infraestrutura nian, iha diretór arbitrájen ho diretór kompetisaun.

“Ami na’in-tolu mak hetan responsabilidade atu akompaña AFC ho FIFA iha prosesu diskusaun ida-ne’e,” Jánio Tilman informa.

Delegasaun  AFC ho FIFA estadia  iha Timor-Leste durante  loron tolu ho ajenda servisu mak hanesan; loron primeiru, Kuarta (26/11/2025), enkontru tékniku balun ne’ebé direta ho Prezidente FFTL, no Kinta ohin (27/11/2025), halo inspesaun direta hodi haré kondisaun real Estádiu Dili, para haré kondisaun kampu, infraestrutura halo sira ne’ebé maka prienxe ona rekezitu ka lae, tuir padraun AFC no FIFA nian.

Nia afirma, hafoin ekipa FIFA ho AFC haré kondisaun  Estádiu Dili  husu FFTL atu prepara proposta dezeñu ba estádiu Dili atu bele halo reabilitasaun.

Diretór Relasaun Internasional no Parseiru Dezenvolvimentu FFTL ne’e hatutan, tuir  rekizitu FIFA ho AFC nian bainhira Estádiu ida presiza tribun (fatin tur) ba adeptus sira mínimu 5000, tanba ne’e mak husu konsultan sira bele haré hikas fali para bele prienxe rekezitu sira ne’ebé FIFA husu.

Tuir inspesaun ne’ebé FIFA ho AFC halo haré katak iha kestaun balun mak presiZa mellora, no Estádiu Munisipál DIli ne’e prienxe ona mínimu 60% hanesan ne’e.

Ba dokumentu no formuláriu sira ne’ebé iha, FIFA ho AFC husu halo revizaun fali, depois haré kustu sira hotu-hotu ne’ebé akumula kondisaun hotu ne’ebé sira husu ba dezeñu ida ne’e, atu bele finaliza para envia iha fulan-Dezembru, no situasaun ne’e FIFA ho AFC informa diretamente ba konsultan lokál dokumentu investimentu nian.

Reportajen ekipa Rafa.tl