FFTL Ofisialmente Dada Sorteiu Ba “Taça Liga FFTL 2026”

FFTL ofisialmente dada sorteiu ba “Taça Liga FFTL 2026”, ne’ebé sei kompete husi klubu futeból 13, Domingu (30/11/2025). Imajen/Rafa.tl

DILI, RAFA.tl–Federasaun Futeból Timor-Leste (FFTL) ofisialmente dada sorteiu ba “Taça Liga FFTL 2026”, ne’ebé sei kompete husi klubu futeból 13  rejistu iha órgaun Liga Futeból Timor-Leste husi primeira divizaun no segunda divizaun.

Notísia Relevante: FFTL Organiza Sorumutuk Anuál ho Asosiasaun Membru sira, “Hanoin Ida Transforma Futeból Sai Orgullu Nasionál”

Prezidente FFTL, Nilton Telmo Gusmão dos Santos, hamutuk ho estrutura no prezidente klubu ho patrosinador sira iha Domingu kalan (30/11/2025), iha Hotel Timor, dada sorteiu ka drowing  ba kompetisaun “Taça Liga FFTL 2026”, ne’ebé sei kompete husi klubu futeból 13, maka hanesan Emanuel F.C, AD SLB Laulara, Aitana F.C, Assalam F.C, DIT F.C, Nagardjo F.C, Portu Taibessi F.C, Coração F.C, Fitun Estudante Lorosa’e F.C, Lica-Lica Lemorai, Karketu Díli F.C, As Marca no Santa Cruz F.C.

Tuir oráriu “Taça Liga FFTL 2026” sei hahú iha loron 16 fulan-Janeiru to’o fulan-Fevereiru tinan 2026, molok kompetisaun regular Liga Futeból Timor-Leste hahú iha fulan-Abríl.

Prezidente FFTL, Nilton Telmo Gusmão dos Santos iha diskursu hatete, Taça da Liga FFTL hanesan inisiativa foun ne’ebé organiza iha mahon FFTL nian, maibé haré Taça da Liga  ema bele hanoin liga foun, maibé la’ós ida-ne’e, maibé ne’e sai hanesan atividade anuál ne’ebé FFTL deside hala’o iha tinan oin, la’ós iha 2025, tuir lolós tenke iha 2026, tanba hanoin hahú iha fulan-Janeiru  ba to’o iha fulan-Fevereiru antes ba iha liga.

Nia afirma, kona-bá Taça da Liga FFTL ne’e, empreza sira ne’ebé fó apóiu, prepara mós surpreza ba jogadór sira ne’ebé hetan mellor, iha jogu sira ne’e.

“Ita nia identidade Taça da Liga FFTL ne’e, la’ós de’it mai husi Federasaun maibé iha kontribuisaun boot husi empreza sira. Iha Taça da Liga, ita buka organiza atividade sira, halibur hotu klubu sira husi primeira divizaun ho segunda divizaun, halo kompetisaun hamutuk de’it. Ne’ebé sei fó prémiu husi empreza Salimagu, hamutuk ho Metrolink atu prepara ba ita-nia jogadór sira, markador no mós mellor ekipa ne’ebé empreza rua kombina ona ho FFTL atu fó surpreza ida-ne’e ba jogadór sira ba atividade ne’ebé sei halo iha fulan-Janeiru ho fulan-Fevereiru,”  Nilton Telmo Gusmão dos Santos hateten.

Prezidente ezekutivu Federasaun ne’e argumenta, objetivu atu realiza Taça da Liga FFTL ne’e hodi sai fundamentu no fó oportunidade promove mós ba klubu segunda divizaun sira, hodi kompete malu ho  klubu primeira divizaun sira.

Nia hatutan, atividade Taça da Liga FFTL ne’e la’ós remata iha tinan ida de’it, maibé iha objetivu fundamentu, atu nune’e, atividade sira ne’e sai regular hanesan kalendáriu Federasaun nian, tanba ne’e, Taça da Liga konsidera hanesan meiu kompetisaun tanba iha Pool hat, ne’ebé tau ona klubu hodi halo kompetidade.

“Lori estrutura nia naran hodi agradese ba empreza sira ne’ebé sai patrisinador hodi apóiu Taxa da Liga ne’e, nune’e hodi prepara mós ba liga ne’ebé sei realiza iha fulan-Abril tinan 2026,” Nilton Telmo Gusmão dos Santos tenik.

Aleinde ne’e, iha Taça da Liga FFTL mós atu prepara fini jogadór sira, tanba jogu ne’e sai doméstika, tanba ho jogu ne’ebé la la’o implika no lamenta hodi krítika fali selesaun jogadór sira ba lakon ne’e, tanba empatia ida laiha atividade jogu iha rai laran no mos laiha jogu doméstika ne’ebé sai kompetitivu  para suporta jogadór sira nia kondisoens téknika para frekuenta jogu rejionais sira ne’ebé partisipa.

Prezidente FFTL ne’e mós fó oportunidade ba klubu sira atu fa’an mós sira nia farda no atributu sira klubu nian iha loja sira ne’ebé FFTL loke ona hodi bele fo rendimentu ba sira, no mos bele promove sira nia jogadór sira nia jersey.

Iha fatin hanesan Sekretáriu Jerál Klubu AD SLB Laulara, Domingos Caero hatete, sira prontu hodi kompete, tanba iha pool A ne’e klubu tolu hanesan AD SLB FC,  Emanuel FC ho Aitana FC sai kompetetivu loos ne’ebé  AD SLB FC ho Emanuel FC  maka sei abertura jogu dahuluk ba Taça da Liga FFTL 2026 iha loron 16 fulan-Janeiru 2026.

“Ami halo kedas preparasaun, primeiru mak ami haré treinadór foun para bele iha fali situasaun foun tanba depois jestór husi klubu nia haré katak, presiza bolu fali treinadór ida foun hodi haré tok,  ema bele dehan mudansa ba   jogu  kestaun jogu abertura serve kualker tempu sempre preparadu,” nia hateten.

Dadaun AD SLB FC entrega ona servisu ida ne’e ba coach foun ne’ebé indika atu nune’e bele buka ona jogadór foun.

AD SLB agora kritéria ida ne’ebé mak taça liga ida ne’e tenke inklui mós jogadór sira husi sub-17 nian,  tanba  haré jogu ne’e tempu badak hela, ne’ebé dala ruma jogadór estranjeiru presija  foti rua hanesan ne’e. No kona-bá jogadór sira klubu entrega ba treinadór para haré asuntu ne’e tanba ne’e  mak preparasaun mezmu treinador ne’ebé indika ne’e aban nia sei sai ba liur akompaña ekipa Sea Games nian, depois sira fila-fali mai bele kompleta hahú treinu di’ak hodi prepara ba abertura taça liga Federasaun.

Prezidente Klubu Emanuel FC,  Aleixo de Carvalho Monteiro hatete, hanesan klubu Emanuel foin dadauk liga ne’e nia iha segundu lugar maibé futeból ne’e 90 minutu mak determina ne’ebé hein de’it iha loron 16 fulan Janeiru 2026 ba abertura ne’e.  Emanuel FC prontu para atu kompete iha ne’ebá.

Aleixo de Carvalho Monteiro  afirma Emanuel ninia moto katak  harí hametin no haburas, ninia konseitu filozofia  ne’e, Emanuel seidauk to’o hanoin ba internasionál tanba hakarak promove talentu Timor oan nian, joven sira Timor oan ne’e mak iha talentu futeból, ida ne’e  mak Emanuel nian, no seidauk hanoin atu foti jogadór internasionál.

Iha sorteiu ne’ebé dada, Pool A kompostu husi klubu tolu hanesan, Emanuel F.C, AD SLB Laulara, Aitana F.C. Pool B kompostu husi klubu tolu hanesan, Assalam F.C, DIT F.C, Nagardjo F.C. Pool C kompostu husi klubu haat hanesan,  Portu Taibessi F.C, Coração F.C, Fitun Estudante Lorosa’e F.C, Lica-Lica Lemorai, no ikus liu Pool D kompostu husi Karketu Díli F.C, As Marca no Santa Cruz F.C.

Reportajen ekipa Rafa.tl