FATL ho ME Sei Implemeta Programa Kid’s Athletics Ba Eskola Sira iha Timor-Leste

Prezidente FATL, Afrânio Xavier assina MoU ho Ministra Edukasaun, Dulce de Jesus, hodi implementa programa Kid’s Athletics ba eskola hotu iha teritoriu nasionál Timor-Leste, Kinta 07 Agostu 2026.

Díli 07 Agostu 2026 (RAFA)- Federasaun Atletismu Timor-Leste (FATL) assina memorandu entendementu (MoU) ho Governu liu husi Ministériu Edukasaun (ME)  hodi implementa programa Kid’s Athletics ba eskola hotu iha teritoriu nasionál Timor-Leste.

Serimónia assinatura memorandu ne’e hala’o iha salaun Ministériu Edukasaun,  Díli, Kinta-ne’e, ne’ebé marka mós prezensa konvidadu espesiál sira husi  Prezidente Asian Athletics, Dahlan Jaman B. Al-Mahad.

Prezidente Federasaun Atletismu Timor-Leste (FATL) Afrânio Xavier, hateten katak asinatura MoU  ho Ministériu Edukasaun marka pasu importante ida iha dezenvolvimentu atletismu ba labarik sira iha Timor-Leste.

“Esforsu ida ne’e marka istória iha prosesu dezenvolimentu ba labarik, hahú aplika matéria Kid’s Athletics iha eskola ensinu baziku to’o ensinu baziku sentrál,” Afrânio Xavier hateten.

Nia esplika mós katak MoU ne’e  oinsá atu dezenovolve Kid’s Athletics sai hanesan kurikulu aplika iha eskola sira iha tinan hirak tuir mai, tanba ne’e, serimonia assinatura MoU ne’e marka mós prezensa hanesan sasin importa  Prezidente Asia Atletismu ho nia Sekretáriu Jerál .

Kid’s Athletics importante tebes ba labarik sira idade hahu 4-14 anos depois  sira remata tinan ne’e sira bele diside sira hakarak ba modalidade futeból, voleibol, basketebáll tanba atletismu hanesan baziku ida para atu forma karakter labarik sira no   forma sira nia intelijensia.

Iha fatin hanesan, Ministra Edukasaun, Dulce de Jesus Soares, hateten katak Federasaun Atletismu durante ne’e hala’o ona atividade desportiva iha eskola sira, maibé dezenvolvimentu seidauk lao tuir ritmu ne’ebé hakarak. Tanba ne’e, nia konsidera asinatura MoU entre Ministériu Edukasaun no Federasaun Atletismu importante atu hametin koperasaun no habelar atletismu iha eskola sira.

“Federasaun Atletismu implemeta ona atividade ne’e ba eskola sira, maibé seidauk tuir ritmu ne’ebe mak ita hakarak entaun ho asina ona MoU   ne’e Ministeriu Edukasaun mós implemeta ona kurikulu iha Edukasaun hahú husi Pre-eskolar to’o iha ensinu sekundáriu iha ne’ebá disiplina ida naran fizika ne’e konaba desportu,” Ministra Dulcia de Jesus Soares hateten.

Governante ne´e subliña, Ministru Edukasaun tinan ne’e iha ona kuadru kompetensia ba profesor (manorin) nain sira entaun tenke tuir profesor idaidak nia hanorin atu implementa atividade atletismu iha eskola sira.

Jornalista: Davilio Valdamir