Família Saudozu Lú-Olo Agradese Estadu no Liu-liu Povu Ne’ebé Akompaña To’o Haloot iha Jardim dos Heróis Metinaro

Saudozu Francisco Guterres "Lú-Olo" nia oan no faluk Cidalia Nobre Guterres.

Díli, 26 Juñu 2026 (RAFA.TL)- Reprenzentante família Saudozu Francisco Guterres Lú-Olo agradese ba Estadu, polítiku sira no liu-liu ba povu ne’ebé ho domin no sakrifísiu akompaña ho orasaun dezde Saudozu husik iis to’o ba haloot iha fatin deskansa ikus  nian iha Jardim dos Heróis da Pátria, Metinaro, Sesta (26/06/2026).

“Agradese ba kamada hotu-hotu iha Timor-Leste, ami orgullu tanba ami nia maun Lú-Olo nia mate ema hotu, partidu polítiku hotu-hotu partisipa,  Ida-ne’e maka Lú-Olo duni. Lú-Olo ema ida pasensia, ema ida simples ne’ebé sai ezemplu ba ema hotu. Ha’u orgullu ba ha’u nia maun, tanba ezemplu di’ak ba ha’u, nune’e mós ha’u husu ba hotu-hotu, iha membru sira hotu-hotu ne’ebé maka iha partidu FRETILIN modelu ida-ne’e labele mate. Francisco Lú-Olo maka mate, espiritu Lú-Olo tenke moris iha FRETILIN nia laran, tenke moris,” Domingos Guterres nu’udar alin ida husi Saudozu Lú-Olo, hateten iha nia liafuan agradesimentu hafoin haloot Saudozu Lú-Olo iha Jardim dos Heróis da Pátria, Metinaro.

Domingos Guterres hatutan povu ne’ebé maka akompaña sai ezemplu ida ba hotu-hotu, tenke moris ho ida-ne’e.

Reprezentante família ne’e mós husu deskulpa ba buat ne’ebé maka maktoban durante moris halo, sekarik iha polítiku saudozu halo buat ruma  lalos karik em-nome família hakruk no husu deskulpa.

Iha nivel polítika liu-liu iha governante sira karik iha buat ruma naksalak, ka  nia halo direta ka indireta pesoalmente hodi família nia naran hakruk husu deskulpa.

Durante halo vida sivil no durante iha resistensia nia laran, iha liafuan balu ne’ebé la loos karik tantu saudozu nia desizaun no orientasaun sira ba ema hotu-hotu ne’ebé la loos karik em-nome familia hakruk no husu deskulpa.

Reprezentante família ne’e mós rekomenda ba Estadu no Governu hamutuk ho polítiku sira, veteranu sira atu fó liman ba malu hadi’a saida mak ladi’ak no lori buat di’ak sira lao ba oin hanesan ezemplu murak saudozu Francisco Guterres Lú-Olo husik hela.

“Ba ha’u nia maluk sira hotu-hotu, povu doben Timor-Leste ne’ebé maka ohin prejensa iha serimonia Maktoban nian fatin ikus ida ne’e, ha’u hanoin povu triste, la’os familia deit maka triste, Timor-Leste triste, tanba Lú-Olo ema simples maibé hakarak duni hakoak ema hotu. Nia la haré ba koor, la haré ba rasa, la haré ba metan ka mutin, maibé nia haré hanesan ema Timor oan.” Domingos Guterres tenik.

Alin husi Saudozu ne’e mós ho triste no matan-been iha Jardim dos Heróis da Pátria Metinaro hato’o mos liafuan adeus ba saudozu, despedida ida ne’ebé nakonu ho testemuña husi povu ne’ebé hadomi Saudozu.

“Adeus Maun Lú-Olo, Adeus! Tau matan hela mai ami, tau matan mós ba oan kiak nain-haat, ba ha’u nia bin Cidalia no familia hotu-hotu, tulun mós ba kamarada sira hotu iha ne’e no mós ba maun sira ne’ebé uluk hamutuk iha ne’e liu-liu maun Taur, maun Lere, maun-boot Xanana, nu’udar mos maun ida ne’ebé diak, maun Falur, maun sira seluk ne’ebé ha’u la temi ida por ida. Maun nu’udar maun di’ak Ida, tama sira nia laran ba, hamamar sira nia laran, fo liman ba malu ba Timor-Leste  ida deit. Obrigadu maun Lú-Olo,” Domingos Guterres subliña.

Iha fatin hanesan Sekretáriu-Jerál Partidu FRETILIN,  Marí Alkatiri hateten, ohin hamutuk ho mana Cidalia ho subriña no sobriñu sira hotu mai halot kamarada Saudozu Lú-Olo iha fatin ida  ideia sai husi ami hotu atu kria kondisoens hodi bele fó kondisoens, hodi memoria sira ne’e buras atu bele haburas istória.

“Agradese ba entidade tomak, apoiu tomak husi governu no estrutura, instituisaun estadu nia hanesan Polísia, Forsa Armada ne’ebé durante ne’e apoiu másimu ba iha Saudozu nia falesimentu to’o halot iha fatin deskansa ikus nian,” Mari Alkatiri hateten.

Iha serimónia funebre ne’e entrega mós arma saudozu nian ne’ebé maka uluk uza iha ai-laran ba Tenente Jenerál Domingos Raúl Falur Rate Laek.

Entrega mós medalla ba saudozu  nia oan mane-boot Francisco Cidalino ”Ola Kay”  no entrega mós Bandeira Nasionál husi Prezidente Repúblika José Ramos-Horta ba saudozu nia oan mane segundu Eldino Nobre.

Entrega mós Dekretu Prezidente Repúblika husi eis-Primeiru-Ministru Taur Martan Ruak ba Saudozu nia oan feto  mesak Dália Luliana Nobre.  Nune’e, entrega mós Bandeira FALINTIL husi Jenerál Taur Matan Ruak ba Saudozu nia ona Mane da-toluk Felizito Samora Guterres.

Tuir observasaun Rafa.tl nian nota katak tuir dalan ba Metinaro, karreta funerariu ne’ebé tula saudozu Francisco Guterres Lú-Olo nia kaixaun akompaña hosi sidadaun sira ne’ebé basa-liman, kari ai-funan, ka reza omenajen ba eis-Prezidente Repúblika iha dalan sira to’o ba Metinaro, fatin deskansa ikus saudozu nian.

Iha Jardim dos Heróis da Pátria Metinaro, Prezidente Repúblika José Ramos-Horta, Vise-Primeiru-Ministru Francisco Kalbuadi Lay no Mariano Assanami Sabino, membru Governu, Prezidente Parlamentu Nasionál Maria Fernanda Lay, Deputadu sira, hamutuk ho sidadaun sira, veteranu, reprezentante relijiozu sira no membru komunidade husi parte oioin no mós kuadru superiór sira partidu politiku hotu, militante no simpatizante partidu FRETILIN, ne’ebé lori mós ho atributu partidu nian liu-liu Bandeira FRETILIN hodi fó omenajen ikus ba saudozu Francisco Guterres Lú-Olo iha nia deskansa fatin ikus ba eternidade.

Jornalista: Remigia Locatelli/Editór: Vito Salvadór