F-FDTL ho Governu Agradese Povu no Entidade Hotu iha Komemorasaun Loron FALINTIL Ba Dala-51

KOmisaun organizadora loron FALINTIL ba dala-51 hato'o agradesimentu ba povu entidade hotu-hotu liuhosi konferénsia imprensa, Kinta 27 Agostu 2026.

Díli, 27 Agostu 2026 (RAFA) – Responsável Komisaun Organizadora ba Komemorasaun Loron Nasionál FALINTIL ba dala-51, Xefe Estadu-Maiór FALINTIL-Forsa Defeza Timor-Leste (F-FDTL), Brigadeiru Jenerál José da Costa Soares “Trix” lori Komandu Jerál F-FDTL no Governu liuhosi Ministeriu Defeza, agradese ba povu no entidade hotu, seitor privadu nasionál ne’ebé fó apoiu no kontribuisaun iha komemorasaun loron FALINTIL ba dala-51 ne´ebé realiza iha Foho Matebian, Suku Abo, Postu-Administrativu Quelicai, Munisipiu Baucau, 20 Agostu 2026.

Xefe Estadu-Maiór F-FDTL, Brigadeiru Jenerál Trix, liuhosi konferénsia imprensa iha Kuartel Jenerál F-FDTL, Díli, Kinta-ne’e, hateten susesu atividade komemorasaun ne’e la’ós rezultadu husi servisu Komisaun Organizadora mesak, maibé mós  apoiu boot husi instituisaun estadu no privadu.

“La’ós de’it ami mesak organiza eventu aniversáriu loron FALINTIL ba dala-51 iha Matebian, maibé ho mós apoiu husi instituisaun barak. Agora, ami nu’udár Komisaun Organizadora hakarak klarifika instituisaun sira ne’ebé fó apoiu no kontribuisaun,” Brigadeiru Jeneral José da Costa Soares “Trix” hateten.

Brigadeiru Jenerál hateten katak apoiu ne’e inklui alimentasaun, orsamentu, kombustível, ekipamentu, rekursu umanu, transporte no apoiu ba servisu saúde no seguransa durante atividade komemorasaun.

Apoiu alimentasaun, tuir lista ne’ebé Komisaun Organizadora aprezenta, apoiu alimentasaun mai husi instituisaun no entidade sira, inklui:  Vise-Primeiru-Ministru, karau haat no fahi rua, Câmara do Comércio e Indústria de Timor-Leste (CCI-TL), foos saku 100,  Presidente Autoridade Munisípiu Baucau foos saku 200, karau rua, Supermie 20 dos,  Ministériu da Solidariedade Social e Inclusão (MSSI)   apoiu alimentasaun, no emprezáriu sira husi Baucau, mina dapur nian dos lima, sardiña enlatada kaixa hitu, foos  saku lima, bee kaixa 10 no supermie kaixa 10.

Komisaun Organizadora mós aprezenta apoiu orsamentu husi instituisaun no kompañia sira, entre sira: Gabinete Prezidente Repúblika – apoiu orsamentu, – Vise-Primeiru-Ministru – US$2.000, Tractorindo – US$2.000, São Callisto Caravário – US$1.000,  Fortuna Star, Lda. – US$200, Timor Safari 4×4 Unip., Lda. – US$300,  Aitula Fuels – US$100, Gio Motor Unip., Lda. – US$500, CDFG Fuel – US$200.

Apoiu kombustível Ba área kombustível, Ministériu do Planeamento Estratégico e Investimento (MPEI), liuhosi Esperança Timor-Oan (ETO), fó apoiu kombustível hamutuk 3 tonelada, enkuantu Mell Carnell Unip, Lda fó apoiu kombustível hamutuk 5 tonelada.

Apoiu ekipamentu Instituisaun sira mos fó apoiu ekipamentu ba preparasaun no realizasaun atividade, inklui: Institutu Gestão de Equipamentos (IGE) – ekipamentu pesadu 6,  Bee Timor-Leste (BTL, E.P.) – instalasaun bee potável,  Eletricidade de Timor-Leste (EDTL) – instalasaun eletrisidade ba kampu parada, Agência do Desenvolvimento Nacional (ADN, I.P.) – lampu sorot 400 watt hamutuk 10 no perfil/rezervatóriu bee 3.000 litru hamutuk 5,  Autoridade de Proteção Civil (APC) – sintina móvel ba VVIP no VIP, lona boot ba forsa grosu 20, lona ki’ik 4 no fogãu manual 6, Ministériu da Administração Estatal (MAE) – tribuna, kadeira, sistema sonu no tenda, Associação do Museu da Resistência Timorense (AMRT) – apoiu dokumentasaun no filmagem atividade.

Apoiu rekursu umanu instituisaun sira fó apoiu hanesan:  Ministériu da Justiça, liu husi equipa Guarda Prizional – ema 5 atu ajuda servisu iha eskada ba peregrinasaun, PNTL – ema 47 ba seguransa no kontrolu tráfiku,  Ministériu Saúde, liu husi Hospital Referal Eduardo Ximenes (HOREX), Saúde Munisípiu, SAMES, Hospital Nasionál Guido Valadares, Ambulánsia Nasionál no Klínika Veteranu – hamutuk ema 86 ba atendimentu médiku iha Postu Administrativu Kelikai, Ministériu Juventude, Desportu, Arte no Kultura (MJDAC), liu husi SEAK – apoiu ba serimónia no atividade kulturál.

Apoiu transporte Komisaun Organizadora mos simu apoiu transporte husi ministériu, direksaun no instituisaun sira. Viatura sira ne’ebé uza inklui Toyota Hiace, Toyota Hilux, Hilux Vigo, Hilux Revo, bus, Pajero Sport, Toyota Prado no Toyota Fortuner.

Apoiu transporte mai husi Patrimóniu Estadu, Ministériu Edukasaun, Gabinete Vise-Primeiru-Ministru, MSSI, Polísia Migrasaun, Ministériu Petróleu no Rekursu Minerais (MPRM), Autoridade Protesaun Sivil (APC), Ministériu Agrikultura, Ministériu Turizmu no Komérsiu no Indústria (MTCI), Ministériu Saúde no Prezidente Konsellu Ministrus.

Apoiu husi área Defesa Iha parte seluk, Ministériu Defesa mos fó apoiu ba atividade ne’e, inklui kombustível 8 tonelada no apoiu orsamentu/adiantamentu. Tuir dokumentu ne’ebé Komisaun Organizadora aprezenta, montante adiantamentu ne’e US$99.999,75, ho total invoice US$59.247,50.

Brigadeiru Jeneral José da Costa Soares “Trix” hato’o agradecimentu ba instituisaun no entidade hotu ne’ebé kontribui, konsidera katak kolaborasaun entre instituisaun estadu, setór privadu no komunidade sai parte importante hodi garante komemorasaun Loron FALINTIL ba dala-51 lao ho di’ak.

Nia enfatiza katak komemorasaun loron FALINTIL la’ós de’it atu hanoin istória no sakrifísiu kombatente sira, maibé mós sai momentu atu haforsa unidade, solidariedade no responsabilidade hamutuk iha konstrusaun nasaun.

Jornalista: João Carlos Amaral