Ezekuta Apoiu Orsamentu US$200,000 husi PM Xanana, CI Fasilita Formasaun Reportajen Investigativu Ba Jornalista Na’in-20

Lestantya R. Baskoro nu’udár jornalista senior iha Indonézia fó hela formasuan investigativu ba jornalista Timoroan na'in-20 iha Maubisse, Segunda 20 Abríl 2026.

Maubisse, 20 Abríl 2026, (RAFA.tl)- Conselho de Imprensa  de Timor-Leste  (CI) fasilita formasaun reportajen investigativu ba jornalista Timroan na’in-20 durante loron lima iha Postu Administrativu Maubisse, Munisípiu Ainaro.

Formasaun ne’e parte ida husi formasaun sira seluk tuir mai hodi ezekuta apoiu orsamentu subvensaun husi Primeiru-Ministru Xanana Gusmão  ho montante US$200,000.00 ba Conselho de Imprensa  iha Orsamentu Jerál Estadu (OJE) 2026.

Iha diskusaun no aprezenta orsamentu Conselho de Imprensa  nian ba tinan fiskal 2026 iha Komite Revizaun Orsamentu (CRO), fulan hirak liubá, orgaun reguladór média iha Timor-Leste ne’e aprezenta nia planu orsamentu ho montante US$600,000.00, maibé  PM Xanana konsidera importansia tebes atu hasa’e kapasidade jornalista timoroan sira-nian iha reportajen investigativu, maka PM Xanana deside hasai orsamentu subvensaun husi Gabinete Primeiru-Ministru nian ho montante US$200,000.00 fó ba Conselho de Imprensa jere hodi fasilita formasaun jornalizmu investigativu ba jornalista timoroan sira hotu.

Fromasaun jornalizmu investigativu iha Maubisse  ho tema “Uncovering the Truth: Strengthening Investigative Journalism and Strengthening the Media’s Watchdog Role” sei termina  iha loron 25 fulan-Abríl 2026, ne’ebé aberturamente hala’o husi  Diretór Ezekutivu CI, António Dias.

“Ita hotu hatene, ita-nia Primeiru-Ministru Kay Rala Xanana Gusmão haré katak iha nesesidade atu fó formasaun ba ita nia jornalista sira. La’ós jornalista Timor-Leste la hatene buat ida, mais tanba situasaun agora Estadu iha osan oituan fasilita ita jornalista sira atu hasa’e kualidade informasaun,” Diretór Ezekutivu CI, António Dias hatente iha nia intervensaun iha ámbitu serimonia abertura formasaun jornalizmu investigativu ne’ebé hala’o iha Maubisse.

Membru CI, Joaquim de Fátima Coutinho, husu jornalista sira atu aproveita formasaun investigativu  ne’e atu bele eleva di’ak liután koñesimentu no bele servisu ho di’ak liután.

“Ha’u husu ba kolega sira balu husi Díli, balun husi  Munisípiu no kolega jornalista sira iha Maubisse  atu aproveita didi’ak treinamentu ida ne’e para fila husi fatin ne’e ba halo kobertura karik tenke kle’an  ho investigativu,” reprezentante jornaista iha CI Joaquim de Fátima Coutinho hateten.

Iha inisiu formasaun jornalizmu investigativu ne’e, CI kontrata formadór husi Indonézia, Lestantya R. Baskoro. Nia nu’udár jornalista seniór iha Indonézia, peritu ba imprensa iha Konsellu Imprensa Indonézia (DPI, sigla indonézia) no formadór iha Institutu Tempo Media Group.

Jornalista na’in-20 ne’ebé partisipa iha formasaun reportajen investigativu iha Maubisse kompostu husi jornalista husi Rafa & NTV, RTTL, E.P, STL, Hatutan.com, Díli Post, Loluwari, Rádiu Komunidade Mauloko, Mídia Lian Orluli, Rádiu Komunidade Comoro, SapnewsTL, Mídia Mudansa, Mídia Demokrasi,  Rádiu Liberdade, ho Mídia DFM.

Jornalista: João Carlos/Editór: Vito Salvadór