Ezekusaun Orsamentu Jerál Estadu 2026 Atinje 52,4%

Prezidente Komisaun C Parlamentu Nasionál, Cedelizia Faria dos Santos.

Díli, 02 Setembru  2026 (RAFA)– Prezidente Komisaun C trata asuntu Finansa Públiku, Cedelizia Faria dos Santos, konfirma katak ezekusaun Orsamentu Jerál Estadu (OJE) 2026 iha trimestre da-tolu atinje 52,4%.

Membru Parlamentu Nasionál ne’e haktuir to’o iha data ida-ne’e  haré ba ezekusaun Orsamentu Jeral Estadu (OJE) tinan 2026, tama iha fulan-Setembru nia ezekusaun total atinje ona 52,4%.

Nia afirma, haré ba ezekusaun  kada kategória, hanesan  bens servisu atinje 50%, kapitál dezenvolvimentu atinje 50%, no tuir Deputada ne’e katak ezekusaun kapitál menor mak baixu uituan tanba foin atinje 30%.

“Ami fó hatene katak tinan 2026 inklui orsamentu retifikativu nia ezekusaun ne’e di’ak ona, tanba depois fulan-Setembru, ita foin liu fulan-Jullu, fulan-Agostu ninian ezekusaun 50% itál hanesan komisaun C konsidera katak ezekusaun di’ak. Ami fiar katak to’o fulan-Dezembru nia ezekusaun ne’e bele sa’e di’ak liután,” hatete Deputada Cedelizia Faria dos Santos.

Komisaun C rekomenda no husu Governu nu’udár ezekutivu atu tau  atensaun didi’ak ba iha  planu anuál nia orsamentu koloká ona. Importante mak ezekuta programa sira ne’e ho di’ak hodi fó  benefisíu ba  povu, no husu Governu foká dezenvolvimentu nasaun no povu nian nesesidade.

Orsamentu Jeral Estadu (OJE) tinan 2026 ne’ebé aprová iha Parlamentu Nasionál hamutuk billaun 2,291 USD, fahe ba kategória Saláriu  Vensimentu, 476.870.249 USD, Bens no Servisu Korrente 447.904.446 USD, Transferénsia Públika  820.710.160 USD, Kapitál Menór  32.556.960 USD ho  Kapitál Dezenvolvimentu 436.647.379 USD.

Jornalista : Zita Menezes