Estudante sira Kompremete Proteje no Hamoos Tasi Hanesan Rikusoin Ne’ebé Kontribui Ba Kresimentu Ekonomia Timor-Leste

Timor nia reikusoin iha tasi okos. Imajen/repro

Díli, 28 Agostu 2026 (RAFA)- Simpóziu OceanX lori impaktu pozitivu ba pensamentu no karater Estudante sira nian hodi kompromete  atu sai hanesan ajente protetor ba tasi hanesan rikusoin ne’ebé kontribui ba kresimentu ekonomia Timor-Leste nian iha futuru.

Estudante Universidade Nasionál Timor Lorosa’e (UNTL), Cristiano dos Santos ba RAFA iha Sentru Konvensaun Díli (CCD), Sesta-ne’e, hateten, simpoziu OceanX ne’e oportunidade di’ak bele aprende oinsá kuidadu no proteje rikusoin iha tasi laran.

“Esplikasaun sira ohin husi Primeiru-Ministru, Kay Rala Xanana Gusmão katak, rikusoin tasi ne’e presiza tebes ita nia asaun konkreta mak atu proteze tasi, hanesan liuhosi asaun joven no estudante sira mak hamoos no kontrola ita nia rikusoin iha tasi laran,” hateten Estudante Cristiano dos Santos.

Iha fatin hanesan, Estudante Universidade Dili (UNDIL), Manuel da Silva hateten, liuhosi impozium OceanX, sente orgullu ba iha tasi, ohin hotu-hotu haré iha vídeo badak ne’ebé ohin hatudu, hanesan Timor-oan halo viajen ruma labele soe foer iha tasi, tanba ne’e Kreatividade ba iha ema pesoal ida-idak nian, nune’e bele garantia tasi bele moos nafatin.

“Ohin Primeiru-Ministru hateten atu hadomi ambiente husi ema pesoal ninian, atu ita nia tasi bele furak no mós nafatin husi ita bele hamoos nafatin ita nia tasi, atu ita konsistensia ba iha futuru tuir mai,” hatete Manuel da Silva.

Dosente Universidade Nasionál Timor Lorosa’e (UNTL), Alzira de Jesus dos Santos hatutan, hanesan hotu-hotu hatene, tasi Timor hasoru problema barak, liu-liu hanesan lixu no mós degradasaun husi atividade sira ne’ebé estraga ekonomista ho ruin, ai-parapa no seluk.

“Ha’u hanoin liu husi atividade Oceanx ida ne’e, iha momentu dahuluk nian iha 2025, ami tuir iha ne’eba ami aprende teknolojia barak, aprende sira ne’e hotu, ami tau ba iha capasity bulding liu husi hanorin labarik sira. Ami fahe fila fali esperiénsia sira ne’e iha sala de aula. Tuir ha’u nia hanoin karik misaun segundu ita espera bele lori ita estudante sira ba hamutuk partisipa nune’e sira bele iha koñesimentu,” hatete Alzira de Jesus dos Santos.

Dosente ne´e subliña estudante sira iha interese ona maibé atu haklean sira nia koñesimentu presiza lori sira ba iha atividade prátika sira ne’e. Nune’e haklean liu tan estudante sira hatene duni sira proteze ita nia rikusoin rasik, liu-liu oinsá atu jere problema sira ne’ebé iha ona no prevene.

Jornalista: Cristina Ximenes