Estudante Jesuíta iha Sudeste Aziátiku Realiza Konferénsia Kona-bá Dame no Rekonsiliasaun

Delegasaun Estudante Jesuíta sira iha nasaun Sudeste Aziátiku, realiza konferensia internasionál hodi rona mós prespetiva Prezidente Repúblika José Ramos-Horta kona-bá dame no rekonsiliasaun, Kinta 6 Agostu 2026.

Díli, 06  Agostu  2026 (RAFA.TL)-  Delegasaun Estudante Jesuíta sira iha nasaun  Sudeste Aziátiku, Kinta-ne’e, iha Palásiu Prezidénsial, Díli, realiza konferensia internasionál hodi rona mós prespetiva Prezidente Repúblika José Ramos-Horta kona-bá dame no rekonsiliasaun hodi aprende esperiénsia Timor-Leste nian iha pos-konflitu.

Konferénsia Estudante Jesíta sira nian ne´ebé ho tema, “Dame no Rekonsiliasaun: perspetiva no esperiénsia husi nasaun pós-konflitu ida”, atu estudante sira sani no aprende kona-bá esperiensia no reflete mós oinsá Timoroan sira hakur liu dezafiu sira hodi hamrik iha sira nia prinsipiu sira ba demokratizasaun iha país ne´e.

Reprezentante estudante Jesuíta, Nadine Liana husi Filipina  ba jornalista sira hatete husi sira nia  delegasaun mai ho  Programa Aprendizaun Servisu husi  estudante Jesuíta nasaun Ásia-Pasífiku sira.

“Ami foin mai hodi simu tatoli ho Prezidente Repúblika  kona-bá temátika paz no rekonsiliasaun ne’ebé nia partilla ho ami istória kona-bá ninia  esperiénsia ne’ebé diferente hanesan tempu nian husu hodi negósia prosesu paz kona-bá buat ne’ebé Timor-Leste sai iha nia estadu, kona-bá  esperiensia ne’ebé nia hasoru hodi konstrui rai lulik ida-ne’e,” Nadine  Liana hateten.

Estudante Jesuíta Nadine Liana  hkatuir enkontru ho Prezidente Repúblika hato’o mensajen ba estudante jesuíta sira no husu atu estuda maka’ás no mós husu estudante sira bele halo demostrasaun, maibé ho dalan dame nian no tuir lei haruka.

Fatin hanesan, Amu Izaias Abilio Caldas husi Jezuíta Kolégiu São João Brito Casait, hatutan,  komitiva ida-ne’e mai husi diferente nasaun pertense ba rede boot eskola sejuita nian iha Sudeste Aziátiku.

Atividade ida-ne’e tinan-tinan sempre hala’o no tian hirak liubá hala’o iha nasaun sira seluk, nune’e iha tinan ida-ne’e sira husu atu Timor-Leste sai uma-na’in ba desima sesta edisaun ho tema paz no rekonsialiasaun, husi  prespetiva país pos-konflitu hanesan Timor-Leste.

“Ita konvida membru husi delegasaun sira ne’e atu mai iha ne’e sira pasa semana rua tomak sira sei aprende no rona barak no reflete hamutuk iha sira nia grupu kona-bá paz no rekonsialiasaun husi esperiénsia Timor nian,”Saserdote ne’e tenik.

Estudante Jesuita sira ne’e mai husi nasaun Filipina, Japaun Indonézia Tailandia Honkong nomós Timor-Leste ne’ebé reprezenta husi instituisaun São João  Brito.

Jornalista : Zita Menezes