Noticias

Estudante Finalista Sira Hahú Ezame Nasionál Tinan Akademiku 2026

todayOctober 19, 2026 56

Background
share close

Díli, 19 Outubru 2026 (RAFA)- Estudante finalista sira husi eskola públiku FINANTIL no Eskola privadu São Pedro ho eskola nivel sekundáriu  no tékniku vokasionál sira seluk iha teritóriu nasionál, Segunda-ne’e,   hahú tuir ezame nasionál tinan akademiku 2026 hodi hakat tan pasu ida iha nivel akademiku.

Ezame nasionál kontinua lao ho di´ak maske Timor-Leste sofre poluisaun anin kauza husi insendiu iha Indonézia.  Estudante maioria uza máskara atu prevene an husi risku sira, liu-liu ba moras respiratóriu ne´ebé bele afeita ba sira nia saúde durante priódu ezame nasionál.

Adjuntu Eskola FINANTIL, Sabino Ernesto hatete ba RAFA katak, prosesu ezame nasionál ne’ebé agora daudaun realiza la’o tuir kalendáriu edukasaun ne’ebé trasa tiha ona husi Ministériu.

Nia esplika katak, oráriu ezame nasionál ba tinan akademiku 2026 ne’e hahú husi Segunda 19 to’o  Kinta 22 fulan-ne´e no kontinua ho ezame lokál loron rua no sei termina iha 24 fulan-outubru tinan-ne´e.

“Totál ami nia estudante ne’ebé partisipa iha ezame nasionál ida ne’e 398 no estudante sira ne’e partisipa hotu, ba na’in-ualu (8) mak la partisipa ezame agora daudauk ne’e,” hatete Adjuntu Eskola FINANTIL, Sabino Ernesto iha kna’ar fatin Eskola FINANTIL, Comoro.

Nia informa, bainhira orientasaun husi Minsiteriu Edukasaun liga ba iklima ne’ebé agora daudaun ar ladun mak obrigasaun hato’o ba estudante hotu-hotu tenke uza máskara.

Iha fatin hanesan, Diretór Eskola São Pedro, Padre Matias de Jesus Pinto, SDB hatete, ezame nasionál ba tinan ida ne’e São Pedro prepara di’ak no estudante hotu kontinua uza máskara tamba kauza husi poluisaun anin ne´ebé iha.

Saserdote ne´e esplika iha nivel Ensinu báziku ninian estudante hamutuk 224 no ba sekundária nian mak 263 ne´ebé partisipa iha ezame nasionál.

Estudante Ensinu Sekundária Jerál, São Pedro, Programa Ciénsia no Teconologia, Nelviana Auxiliadora Soares Pinto hatete, daudaun ne’e hasoru hela ezame matéria matemátika loron ho di’ak.

“Ha’u sente kontente tanba ohin loron ezame ho di’ak, sente kapás tebes, no pergunta sira ne’ebé ohin ha’u resposta hotu kedas,” dehan Nelviana Auxiliadora Soares Pinto.

Fatin hanesan, Estudante Ensinu Báziku São Pedro, Nelia Patricio Soares informa katak, ohin ne’e ezame nasionál kona-ba matéria matemátika no iha ona preparasaun antes nune´e sente fasil.

Tuir onservasaun RAFA nian iha terenu hare estudante sira hotu ho entuziasmu partisipa iha ezame nasionál ba tinan ida-ne´e no maioria husi estudante kumpri prosedimentu sira ba saúde públika nian hodi kujmpri uza masker no  profesor sira mos kontinua enkoraja estudante atu halo ezame ho konfiansa, no kumpre medida prevensaun saúde durante prosesu Ezame Nasionál 2026.

Jornalista: Cristina Ximenes

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!