Desporto

Ermera Hetan Vitória Da-huluk 3-1 Kontra Covalima

todayNovember 21, 2026 22

Background
share close

Díli, 21 Novembru 2026 (RAFA) – Ekipa futebol mane Munisípiu Ermera hetan vitória da-huluk kontra Covalima ho rezultadu 3-1, iha kompetisaun Festival Nasionál Desportu (FND) 2026  grupu  A ne’ebé hala’o iha Estádiu Munisipál Díli, Sesta-ne’e.

Iha primeira parte, bainhira jogu tama ba minutu 10, jogador Covalima, Bernadino halo falta hasoru jogador Ermera, Sandro Quintão. Insidente ne’e hamosu konfrontasaun entre jogador rua ne’e, nune’e árbitru deside fó kartaun mean ba jogador rua ne’e.

Maski ekipa rua kontinua jogu ho jogador na’in-10, Ermera konsege aproveita oportunidade hosi falta ne’e hodi kolekta uluk sira nia golu 1-0 iha minutu 11, liuhusi Emilio Casairo (4)

Dominasaun Ermera kontinua, no iha minutu 35 Romario Florindo (17) aumenta tan golu ba nia ekipa hodi muda rezultadu sai 2-0.

Molok primeira parte termina, Ermera hetan oportunidade penalidade iha minutu 45+1, hafoin Yohanes rasta Mouzinho de Lima iha área penalidade. Anggison Barbosa (12), ne’ebé sai hanesan ezekutór, konsege konverte penalidade ne’e ba golu, hodi aumenta Ermera nia score sai 3-0.

Iha segunda parte, ekipa rua kontinua hatudu disputa ne’ebé maka’as. Covalima esforsu aan atu hamenus diferensa golu, no esforsu ne’e fó rezultadu iha minutu 90+1, bainhira Jobelquin Nias konsege marka golu ida, hodi taka rezultadu jogu ho score 3-1.

Treinador ekipa Covalima  Nuno Gouveia Leite konsidera, derrota ne’ebé nia ekipa hetan tanba iha fallansu balu inklui jogador sira la rona-malu.

“Ho fallansu tékniku ne’e, ami derrota,  ba jogu tuir mai ami  hasoru Dìli sei hadia diak liután,” tenik Nuno Gouveia Leite.

Alende ne’e  treinador Munisipiu Ermera, Timotio Martins kontente no jogu tuir sei hadia diak liután.

“Ami kontente tanba preparasaun durente tempu naruk, no jogu tuir mai ami sei prepara diak liu-tan hasoru ekipa Ataúro, sira iha ona estratezia oinsa atu hamate jogu husoru Atauro,” subliña treinador ekipa Ermera ne’e.

Ho vitória ne’e, Ermera rekolla pontu tolu  hosi jogu rua, ho rejistu vitória ida no derrota ida. Enkuantu Covalima kontinua ho pontu ida  hosi jogu rua, empate ida no derrota ida.

Jornalista: Marito da Costa

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!