Envolve Peskál Ilegál, Autoridade Timor-Leste Entrega Hikas KM Makmur Rejeki Mulya Ba Indonézia

Ró KM Makmur Rejeki Mulya.

Díli, 27 Agostu 2026 (RAFA)- Autoridade Timor-Leste, liuhosi Polísia Nasionál Timor-Leste (PNTL), Unidade Polísia Marítima (UPM), Servisu Migrasaun (SM), Diresaun Nasionál Transporte Maritima (DNTM) no Autoridade Portuariu Timor-Leste (APORTIL) , Kinta-ne’e, ofisiálmente entrega hikas Ró KM Makmur Rejeki Mulya, ba Embaixada Indonézia iha Timor-Leste.

Ró KM Makmur Rejeki Mulya  kaptura husi autoridade Timor-Leste iha tasi Beaco no Uatucarbau, iha área Kosta Súl  iha loron 16 fulan-Abríl 2026, tanba hala’o atividade peska illegal.

Iha kapturasaun ne’e, Autpridade Timor-Leste mós halo detensaun ba sidadaun estranjeiru na’in-32, tanba tama iha teritóriu Timor-Leste no halo peskas ilegál.

Komandante UPM, Superintendente-Xefe Polísia Eugenio Pereira hateten, despaixu husi Tribunál bá iha UPM no Komandu Jerál Polísia nian ho estrutura tomak, ba kapitaun ró ne’ebé mak sai hanesan mós autór ne’ebé mak mensiona nia naran iha despaixu Tribunál ho nune’e entrega fali ró ba kapitaun.

“Despaixu husi Tribunál Judisiál Primeira Instánsia Baucau ninia ne’ebé mak nia despaixu mai iha UPM no tutela ba iha Komandante UPM ho ninia orientasaun ka asuntu ne’ebé mak mensiona iha ninia despaixu ne’e mak oinsá atu  halo ka fó fila sasán ne’ebé mak kaptura ka detein  iha loron 15-16  fulan-Abríl tinan 2026,” Komandante UPM, Superintendente-Xefe Polísia Eugenio Pereira hateten.

Komandante Polísia ne´e dehan, nia prosesu tomak la’o bazeia ba orientasaun juridiku, ne’ebé mak Komandu Munisípiu Lautém simu orientasaun husi donu prosesu hanesan Prokurador, no promove bá iha Tribunál finalmente desizaun husi Tribunál hodi aplika pena administrativu ba autór sira ne’ebé mak involve iha kazu ne’e.

Enkuantu husi prosesu tomak ne’ebé mak Tribunál  Judisiál Primeira Instansia  Baucau halo konklui ona ninia prosesu tomak finalmente.

Komandante UPM subliña Governu husi Indonézia nafatin ho kompromisiu katak autoridade nasaun rua servisu hamutuk nafatin luta kontra halo prevensaun ba atividade ne’ebé mak envolve bá aktu krimi nian.

Jornalista: Juvinal Cabral