Enkontru OMS-SEARO iha Díli, Ministériu Saúde Prevee 500,000 USD

Ministra Saúde, Élia A.A dos Reis Amaral.

Díli, 13 Agostu 2026 (RAFA) —  Governu liuhosi Ministériu Saúde (MS) prevee dotasaun orsamentu ho montante  500,000 USD hodi organiza enkontru Komité Rejionál Organizasaun Mundiál Saúde ba Rejiaun Sudeste Aziátiku (OMS-SEARO) ba dala-79.

Enkontru nivel rejional no mundiál ne’ebé sei konsentra iha Sentru Konvensaun  Díli (CCD, sigla portugés), sei hala’o iha loron 7 to’o loron 9 fulan-Setembru, tinan-ne’e.

Ministra Saúde, Élia  A.A dos Reis Amaral ne’ebé sai hanesan xefe komisaun organizadora ba eventu nivel mundiál ne’e, informa katak preparasaun ba enkontru refere to’o ona pursentu 80.

Nia hateten Diretór-Jerál OMS, Tedros Adhanom Ghebreyesus, sei partisipa iha enkontru ne’e, hamutuk ho Ministru Saúde no autoridade saúde sira husi nasaun membru OMS-SEARO.

Governanate ne’e haktuir enkontru sei fó mós oportunidade ba Timor-Leste atu hametin kooperasaun ho OMS no Estadu membru sira, liuliu iha esforsu atu kombate moras hanesan tuberkulose (TB), HIV/SIDA no lepra.

“Bainaka balun sei mai husi loron 6  fulan-Setembru,”  Ministra Élia A. A. dos Reis Amaral ba jornalista sira.

Reprezentante nasaun sira ne’ebé sei partisipa iha enkontru ne’e Índia, Nepal, Bangladesh, Maldivas, Sri Lanka, Tailándia, Mianmar, Indonézia no Timor-Leste.

Timor-Leste sai estadu membru OMS iha tinan 2002 no integra OMS-SEARO dezde 2003 no antes ne’e, Timor-Leste mós sai ona uma-na’in ba enkontru Komité Rejionál OMS ba dala-69, iha tinan 2015.

Enkontru OMS-SEARO ba dala-79 ne’e sei sai plataforma importante ba Ministériu Saúde no autoridade saúde sira husi nasaun membru atu diskute no koordena prioridade saúde rejionál, inklui reforsu sistema saúde, prevensaun no kontrolu moras, no resposta ba dezafiu saúde komún sira.

Ministra Saúde,  Élia dos Reis Amaral sei uza oportunidade ne’e atu hametin relasaun no kooperasaun ho OMS no nasaun membru sira, no hodi hatudu kapasidade Timor-Leste nu’udar uma-na’in ba enkontru saúde nivel internasionál.

Jornalista: Remigia Locatelli