Empreza ETO Hahú Mapeamentu Geolójiku Hodi Buka Potensial Rekursu Naturais

CEO empreza grupu ETO, Nilton Telmo Gusmão dos Santos.

Díli, 05 Juñu 2026 (RAFA.TL)- Empreza Grupu Esperança Timor Oan (ETO), hahú  halo implementasaun ba atividade mapeamentu geolójiku iha área lisensiada sira, depois hetan aprovasaun hosi Autoridade Nasional Petróleu (ANP), hodi halo planu esplorasaun inisiál atu identifika no avalia potensia rekursu naturais ne’ebé Timor-Leste iha.

Notísia Relevante: ETO Group ho Governu Asina Kontratu Fahe Produsaun iha Área Kontratuál Bloku B Onshore

CEO empreza grupu ETO, Nilton Telmo Gusmão dos Santos, ba Jornalista sira iha Otel Timor, Díli, Sesta (05/06/2026), informa ANP iha semana kotuk aprova ona planu servisu ne’ebé empreza grupu ETO submeter, nune’e ekipa tékniku sira prepara ona atu hahú atividade iha terenu iha tempu badak tuir kalendáriu servisu ne’ebé konkorda ona ho ANP.

Nilton Gusmão informa durante tinan ida-ne’e atividade prinsipál sei foka de’it ba esplorasaun geolójiku no seidauk tama ba atividade téknika ne’ebé boot ka kompleksu liu.  Tékniku sira sei halo observasaun iha área lisensa nian hodi rekolla informasaun kona-bá fatuk, rai no ai-horis sira atu identifika indikasaun rekursu naturais ne’ebé bele iha potensial iha futuru,

“Ami foin submete ami nia planu  servisu ba ANP, ami foin hetan aprovasaun iha semana kotuk, tanba aprovasaun ne’e iha ona ami sei hahú servisu iha terenu iha tempu badak, maibé planu inisiál ba iha tinan ida ne’e, ita halo de’it jeolójiku tantu ita sei la iha atividade ne’ebé todan liu. Ita nia tékniku sira sei la’o de’it ba zona ne’ebé ami iha lisensa ba rekolla fatuk hodi bele koñese ita nia rai, talvez mina matan ruma iha ne’ebá karik para depois identifika uluk buat sira ne’e para halo mapa antes  tinan oin ita ba aprezenta fila-fali servisu ida ne’ebé ita bolu dehan ba liu ona iha área tékniku nian,” Nilton Telmo Gusmão dos Santos hateten.

Nilton Gusmão hatutan,  prosesu iha ona andamentu, espera katak sei kontinua hala’o nafatin atividades tuir kalendáriu ne’ebe trasa hamutuk ona ho autoridade Nasional Petróleo hodi bele atinji objetivu ne´ebé empreza no governu konkorda ona.

“Tinan ne’e halo servisu esplorasaun Jeolójiku de’it, ita nia tékniku sira se’i la’o ba haré fatuk, hili fatuk, haré aihoris saida mak iha ne’ebá eziste haré kona-ba rai,  buat sira ne’e hotu para ita haré kona-bá mapa Jeolójiku ba identifika no lori material sira ne’e ba halo teste laboratorium para bele fó indikasaun ruma ba ita para molok ita ba faze tuir mai tantu tinan ne’e,” Nia esplika.

Antes ne´e, Autoridade Nasionál do Petróleu (ANP) fó ona lisensa ba empreza grupu  ETO liuhosi subsidiária ETO E&P 1, Unipessoal, Lda, liu hosi Kontratu Fahe Produsaun ka Production Sharing Contract (PSC) ba Perfuração Esplorasaun Rai-Maran (Onshore) iha Área Kontratu Bloku B iha Timor-Leste.

Kontratu ne’e hanesan pasu importante ida tanba ETO manán bloku refere liu-hosi konkursu públiku internasionál, no reprezenta mós pasu signifikativu ba empreza lokál iha área minarai no petróleu.

Jornalista: Davilio Valdamir/Editór: Vito Salvadór