Noticias

Emiradu Árabe Unidu Prontu Finánsia Projetu Estratéjiku iha Timor-Leste

todayNovember 17, 2026 41

Background
share close

Abu Dhabi, 17 Novembru 2026 (RAFA) –  Prezidente Repúblika, José Ramos-Horta hatete, Emiradu Árabe Unidu (EAU) hatudu interese no prontidaun atu finansia projetu estratéjiku oioin iha Timor-Leste, inklui refinansiamentu dívida, dezenvolvimentu agrikultura, ekonomia verde no konstrusaun ospitál foun ba kardiolojia.

Jornalista RAFA, Cristina Ximenes ne´ebé akompaña vizita Xefe Estadu iha iha Abu Dhabi, Tersa-ne´e, informa katak EAU prontu atu ajuda Governu Timor-Leste liuhusi mekanizmu refinansiamentu, ne’ebé bele permite Governu rekupera osan ne’ebé uza ona husi empréstimu instituisaun finanseira internasionál, hanesan Banku Dezenvolvimentu Aziátiku (ADB) no Banku Mundiál.

Xefe Estadu mós destaka proposta projetu integradu ekonomia verde iha Laklubar, ne’ebé EAU hatudu prontidaun atu fó apoiu finanseiru.

Iha setór saúde, EAU prontu atu ajuda Timor-Leste harii ospitál foun ba kardiolojia, tuir komunikasaun no koordenasaun ne’ebé hala’o ona entre autoridade Timor-Leste no EAU.

“Emiradu Árabe Unidu sira prontu atu fó osan ba governu, atu governu rekupera tiha ona osan ne’ebé mai husi emprestimu ne’e mak bolu refinasia ba ita nia governu. Buat sira seluk tan agrikultura, projetu espesiál ida ne’ebé uluk ha’u ko’alia maun Xanana, maibé ha’u mak hakarak haree, halo projetu ne’e iha Laklubar. Projetu integradu ida ekonómia verde, Emiradu Árabe Unidu prontu atu halo finansiamentu ba ida-ne’e partisipasaun no seluk tan,” hatete Prezidente Repúblika, José Ramos-Horta.

Prezidente Ramos-Horta husu membru governu, liu-liu ministru sira ne’ebé iha responsabilidade direta, atu asegura akordu hotu-hotu ne’ebé asina ho parseiru internasionál bele konkretiza iha implementasaun.

Ramos-Horta mós konsidera, relasaun Timor-Leste ho EAU iha oportunidade boot atu sai forte liután, liuliu iha área infraestrutura, portu marítimu, aeroportu, enerjia renovável no teknolojia intelijénsia artifisiál (IA).

Nia afirma, kooperasaun internasionál ne’e bele lori benefísiu boot ba dezenvolvimentu nasionál, maibé depende mós ba seriedade no kompromisu Governu atu kumpre responsabilidade.

Prezidente Ramos-Horta husu atu governu la limita de’it ba asina akordu, maibé tenke transforma kompromisu internasionál sira ne’e ba projetu konkretu ne’ebé fó benefisiu ba povu. ***

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!