Emiradu Árabe Unidu Prontu Apoiu Timor-Leste Ba Prezidénsia ASEAN 2029

MNEk Bendito Freitas halo enkontru amigavel ho Ministra Estadu iha Ministériu Negósiu Estranjeiru Emiradu Árabe Unidu (EAU), Noura Al Kaabi iha Díli, Segunda 31 Agostu 2026.

Díli, 31 Agostu 2026 (RAFA) –Ministra Estadu iha Ministériu Negósiu Estranjeiru Emiradu Árabe Unidu (EAU), Noura Al Kaabi, hato’o prontidaun Governu EAU nian atu apoiu Timor-Leste bainhira nasaun ne’e asume Prezidénsia ASEAN iha 2029.

Deklarasaun ne’e Ministra Noura Al Kaabi relata iha enkontru ho Ministru Negósiu Estranjeiru no Kooperasaun, Bendito dos Santos Freitas, iha Díli, Segunda-ne’e.

Ministra Estadu iha Ministériu Negósiu Estranjeiru EAU, Noura Al Kaabi sente onra bainhira vizita Timor-Leste no hato’o kumprimentus husi lideransa EAU ba lideransa Timor-Leste.

Nia afirma katak nasaun rua estabelese ona relasaun ne’ebé forte no agora sei buka oportunidade atu hametin liután kooperasaun bilateral.

“Ami ko’alia kona-bá projetu no inisiativa barak. Ami aprésia Timor-Leste nia pozisaun ba Emiradus Árabes Unidus durante akontesimentu atuál sira. Timor-Leste sai ona belun ida ne’ebé loos, no ida-ne’e buat ida ne’ebé ami sei nunka haluha,” Noura Al Kaabi hateten.

Nia  dehan ba futuru sei lori oportunidade barak ba nasaun rua, liuliu iha área sustentabilidade, implementasaun projetu, edukasaun no dezenvolvimentu kapasidade.

Ministra Estadu EAU mós refere ba projetu eskola no akomodasaun ne’ebé EAU hala’o hamutuk ho Timor-Leste, inklui esforsu atu dezenvolve kapasidade no rekursu umanu.

Vizita Noura Al Kaabi mai Timor-Leste konsidera hanesan oportunidade atu hametin liután relasaun bilateral no prepara kooperasaun estratéjika entre nasaun rua, liuliu bainhira Timor-Leste prepara an atu asume Prezidénsia ASEAN iha 2029.

Iha fatin hanesan Ministru Negósiu Estranjeiru no Kooperasaun, Bendito dos Santos Freitas, haktuir ba jornalista sira katak vizita ne’e mós sai oportunidade hodi EAU hato’o parabéns ba Timor-Leste kona-ba adezaun ba ASEAN iha Outubru 2025.

“Sira kontente no apresia Timor-Leste, no fó parabéns ba ita-nia adezaun ba ASEAN iha Outubru 2025. Sira mós prontu atu apoiu Timor-Leste ba ita-nia Prezidénsia ASEAN iha 2029,” dehan Ministru dos Santos Freitas.

Nia hatutan vizita nivel altu husi Governu EAU ne’e hatudu atensaun no solidariedade ba Timor-Leste, no espera katak vizita ne’e bele hametin liután relasaun no kooperasaun entre nasaun rua.

“Ha’u espera vizita ida-ne’e bele kuda di’ak liután prinsípiu kooperasaun no hametin amizade entre ita-nia nasaun rua, liuliu iha liña kooperasaun estratéjika ba futuru, inklui iha área investimentu no dezenvolvimentu rekursu umanu,” Ministru Bendito Freitas subliña.

Nia dehan Timor-Leste no EAU sei kontinua servisu hamutuk liuhusi ekipa téknika no liña ministeriál sira atu define no atualiza prioridade kooperasaun, liuliu iha área infraestrutura, lojístika no dezenvolvimentu rekursu umanu.

Ministru Bendito mós agradese ba Governu EAU tanba apoiu ne’ebé fó ona ba Timor-Leste iha área oioin, inklui saúde, edukasaun no dezenvolvimentu rekursu umanu.

Nia mós destaka apoiu EAU ba konstrusaun rezidénsia feto estudante universitária iha Timor-Leste, ne’ebé konsidera hanesan kontribuisaun importante ba dezenvolvimentu no bem-estar komunidade.

Tuir ministru, relasaun entre Timor-Leste no EAU la’ós de’it iha área dezenvolvimentu, maibé mós envolve kooperasaun diplomátika.

Nia apresia kontribuisaun EAU ba apoiu diplomata Timor-Leste nian no rekoñese pozisaun Timor-Leste iha relasaun ho EAU iha konteksu geopolitika globál.

 Jornalista: Cesarina de Carvalho