Embaixada Xina Prontu Koopera ho Governu Kombate Atividade Ilísitu Scam Call Centre Ne’ebé Maioria Sira-Nia Sidadaun Mak Sai Suspeitu

Suspeitu sira atividade ilísitu scam call centre ne'ebé maioria sidadaun Xina.

Díli, 14  Jullu  2026 (RAFA.TL)-  Embaixadora Xina nian mai Timor-Leste, Wang Wenli, hatete Xina iha posizaun rigór no prontu koopera ho Governu atu kombate kazu Scam Call Centre iha Timor-Leste ne’ebé maioria sira-nia sidadaun mak sai suspeitu.

Embaixadora Xina iha Timor-Leste Wang Wenli hato’o deklarasaun ne’e ba jornalista sira iha Palásiu Prezidensiál, Tersa ne’e, hafoin halo enkontru ho Prezidente Repúblika José Ramos-Horta.

“Ha’u ko’alia ona kona-bá asuntu ne’e ho Prezidente Repúblika, no ami fó sai ona ho klaru governu Xina nia pozisaun kona-bá kestaun ne’e. Katak Governu Xinés iha pozisaun rigorozu atu hapara jogu online sira-ne’e. No fila-fali ba fulan-Maiu tinan kotuk, ami hato’o ona ba governu Timor-Leste kona-bá riskú potensiál jogu online nian,” Embaixadora Wang Wenli hateten.

Embaixadora Xina ne’e afirma, sira nia parte mós antes ne’e relata ona ba nasaun sira Sudeste Aziátiku nian kona-bá impaktu potensiál hosi jogu online ka Scam Call Centre ba iha nasaun ida nia vida.

Embaixadór Xina mai Timor-Leste louva ho funsionamentu efisiénte no lais husi governu Timor-Leste no departamentu polísia ho autoridade seguransa sira husi instituisaun oin-oin ne’ebé servisu hamtuk hodi halo ona  buska ba kazu jogu online Scam Call Centre lubuk iha  teritóriu Timor-Leste, liuliu iha kapitál Díli.

“Governu Xina no nasaun sudeste aziátiku sira, inklui Timor-Leste, durante ne’e servisu hamutuk hodi kontinua prevené jogu ilísitu sira ne’ebé akontese,” Nia subliã.

Diplomata ne’e reafirma katak Governu Xina  proteje maka direitu no interese sira hosi sidadaun Xina nian ne’ebé maka obedese ba lei iha Timor-Leste. Nune’e, kona-bá asuntu deportasaun sidadaun Xineza sira ne’ebé involve aan iha kazu Scam Call Centre ne’e presiza iha kooperasaun entre Governu Timor-Leste ho Governu Xina no tuir   aplikasaun lei hosi nasaun rua ne’e  nian.

Lembra fali katak dezde operasaun inisiu liu kona-bá atividade ilísitu jogu online no scam call centre iha Rejiaun Administerativu Oé-Cusse to’o mai semana hirak ikus ne’e iha Dili laran, hanesan iha Manleuana, Bebonuk, Metiaut no liubá Ulmera-Liquiça, maioria operante sira sidadaun estranjeiru ho nasionalidade Xina.

Jornalista: Zita Menezes/Editór: Vito Salvadór