Ema Moras Mental Sona Reinaldy dos Santos To’o Lakon Vida no Hakanek Vítima Na’in-Rua Seluk

Ekipa Polísia Forensik transporta isin-mate Reinaldy dos Santos ba HNGV hodi submete ba prosesu autopsia. Imajen/Rafa.tl

DÍLI, RAFA.tl –Abitante mane ida ho inisiál FXC  ne’ebé deskonfia moras mental lori tudik rua sona Reinaldy dos Santos to’o lakon vida no hakanek mód vítima Junidia Neno Caet ho Vitalis Colo.

Akontesimentu brutal ne’ebé akontese iha Aldeia Beto Naroman, Suku Madohi, Postu-Administrativu Dom Aleixo, Munisípiu Díli, Segunda (06/03/2026), purvolta tuku 4:00 lorokraik Otl, halo abitante sira iha área refere hafodak no trauma.

Informasaun ne’ebé Rafa.tl halibur husi ema oioin ne’ebé hela viziñu ho família suspeitu FXC katak kileur ona mak FXC sofre moras mental ne’e no baibain nia hakilar de’it.

Tuir sasin sira balun katak dala-ruma mós FXC ne’e hakilar mas kaer kroat iha liman, maibé la fó ameasa seriu ba ema seluk nia vida. Nune’e, maka viziñu ho família sira nunka hato’o keixa ba autoridade kompetente sira.

Ironia tebes. Husi aktu suspeitu FXC ne’ebé deskonfia sofre moras mental ne’e bele rezulta Reinaldy dos Santos ho idade tinan-neen  labele salva no lakon vida, enkuantu vítima na’in-rua seluk, Junidia Neno Caet ho idade tinan-lima, hetan sona no kanek grave iha parte kotuk laran no kelen, vítima ida seluk Vitalis Colo idade 21 mós hetan sona kanek grave iha área kotuk laran.

Hafoin akontese Polísia Nasionál Timor-Leste (PNTL) husi Servisu Investigasaun Kriminál Munisípiu Díli to’o kedas iha lokal akontesimentu adi halo intervensaun no evakua matebian Reinaldy dos Santos ho vitima na’in-rua seluk kanek grave ne’e ba Sentru Saúde Comoro.

Momentu ne’e keda Ekipa  Polísia Forensik transporta matebian Reinaldy dos Santos nia mate isin ba iha Hospital Nasionál Guido Valadares (HNGV) hodi submeter ba prosesu autopsia.

Pedro Caet nu’udar aman husi vitíma  Junidia Neno Caet konfirma katak nia la haré ho matan akontesimentu ne’ebé rezulta nia oan kanek no vítima Reinaldy dos Santos lakon vida, maibé nia rona fali husi família balun, ho nune’e, nia halai mai haré nia oan Junidia Neno Caet ho kondisaun kanek grave iha Sentru Saúde Comoro.

Pedro Caet rasik hatene katak nia oan Junidia Neno Caet halimar hela ho viziñu balu nia oan iha viziñu sira-nia uma.

Daudaun ne’e suspeitu FXC ho idade 30-resin ne’ebé sona vitíma na’in-tolu iha ona sela detensaun Komandu PNTL Munisípiu Díli.

Jornalista: Elio dos Santos da Costa/Editór: Vito Salvadór