Durante Páskua, Motór Lima Lakon iha Díli

Komandante PNTL Munisípiu Díli, Komisáriu-Asistente Polísia, Orlando Gomes

DÍLI, 07 Abríl 2026 (RAFA.tl)– Polísia Nasionál Timor-Leste (PNTL) Munisípiu Díli, rejista motór lima lakon durante selebrasaun tempu Páskua, husi Domingu Ramus to’o Domingo Reisurisaun.

Komandante PNTL Munisípiu Díli, Komisáriu-Asistente Polísia, Orlando Gomes ba Jornalista sira iha Kuartel Jerál PNTL, Tersa (07/04/2026), informa, durante selebrasaun missa Páskua iha área jurizdisaun kapitál Díli,  PNTL simu keixa lima kona-bá motór lima ne’ebé maka lakon iha parokia balu iha Dili laran bianhira motór na’in sira para hela nia motór hodi partisipa misa.

Nia haktuir, iha motór balun ne’ebé maka para dok husi fatin naroman, maibé ekipa servisu informasaun sekreta sira, buka tenta para identifika motór sira ne’e.

“Motór  lima ne’ebé maka lakon durante tempu Páskoa ne’e to’o agora seidauk hetan, no parte Polísia liu husi Unidade Informasaun Sekreta kontinua buka tuir,” Komisáriu-Asistente  Polísia Orlando Gomes informa.

Iha fatin hanesan, portavós Komandu Jerál PNTL, Superientendente Xefe Polísia, João Belo dos Reis, husu ba pesoál sira ne’ebé maka durante  tempu Páskua, sira-nia motór lakon kontinua hakbesik ba iha eskuadra polísia sira hodi bele informa ba Polísia sira atu buka tuir no halo investigasaun hodi loke prosesu tuir lei haruka.

‘’Iha tempu Páskua sarani sira nia motór balun lakon PNTL. Husu nafatin na’in ba sasan ne’ebé lakon informa ba Polísia iha eskuadra ne’ebé besik no bele ba direita iha Komandu Jerál iha parte investigasaun kriminál nian hodi ami bele loke prosesu,’’ Superintendente Xefe Polísia João Belo dos Reis informa.

Polísia mós kontinua informa ba loja na’in sira no kompañia sira hodi koopera ho parte seguransa, karik iha loja balu ne’ebé maka iha Closed-Circuit Television ( CCTV) tenke rekolla evidénsia sira ne’e nu’uné parte Polísia kontinua buka tuir suspeitu sira.

Jornalista: Remigia Locateli/Editór: Vito Salvadór