Dom Leandro: Saudozu Lú-Olo Nia Domin Moris Nafatin iha Povu Nia Fuan

Bispu Dioseze Baucau, Dom Leandro Maria Alves. Imajen/dok.CET

Díli, 26 Juñu 2026 (RAFA.TL) – Bispu Dioseze Baucau, Dom Leandro Maria Alves, ne’ebé preside misa requem ba Saudozu Francisco Guterres Lú-Olo iha Igreja Katedral Díli, Sesta (26/06/2026),  hateten saudozu eis- Prezidente Repúblika Francisco Guterres Lú-Olo nia domin moris nafatin iha povu Timor-Leste nia fuan.

Bispu Dioseze Baucau, Dom Leandro Maria Alves hanoin legadu murak sira ne’ebé Saudozu halo ba povu no nsaun ne’e liu iha nia kompromisiu, sakrifisu no luta naruk ba povu nia moris di’ak ho prinsipiu ida metin ba demokratizasaun iha Timor-Leste no hakribiit injustisa no korrupsaun too husik hela família no povu be nia hadomi.

“Ita agradese ba Maromak tanba haraik mai ita timoroan di’ak ida. Lú-Olo dedika nia moris hodi harii ita-nia rai doben. Nia mós sarani di’ak ida ne’ebé fó sasin ba nia fiar, aman ezemplár ida ba nia família, no ema fiél ida ne’ebé moris tuir valór Evanjellu nian,”  Dom Leandro Maria Alves hateten.

Bispu subliña katak Lú-Olo nia mate reprezenta lakon boot ida ba Timor-Leste, hodi nota katak durante nia moris tomak, nia tau interese nasionál aas liu interese pesoál sira.

“Ita lakon Timor-Leste nia oan-mane ida. Ita hein katak nia kontribuisaun hodi harii nasaun demokrátiku ho justu moris nafatin iha ita nia leet. Hanesan sidadaun, nia dedika nia moris tomak ba nasaun. Halo sakrifísiu sira tinan 24 hodi luta ba libertasaun nasionál no, hafoin independénsia, asumi responsabilidade importante sira iha servisu Estadu nian no iha nia partidu,” Bispu Leandro hateten.

Iha serimónia ne’e, Bispu Leandro deskreve liután Lú-Olo nu’udar ema ida ne’ebé simples, pasiénsia, haraik-an, justu, no onestu ne’ebé atensaun ba ema seluk, hodi haktuir katak kualidade hirak ne’e halo nia sai pontu referénsia morál ba nasaun ne’e. Estuda bele halo ema ida sai matenek, maibé la’ós estudu maka forma ema ida ho karakter. Karakter moris hosi esperiénsia difisil sira, dezafiu sira, no sakrifísiu sira ne’ebé ema ida hasoru iha moris tomak. Tanba ne’e maka ohin loron Timor-Leste iha lutu nia laran, tanba ladún hetan ema ho karakter hanesan nia.

Tuir Bispu ne´e, Timor-Leste presiza líder sira ho kualidade hanesan Lu-Olo hodi hametin demokrasia no justisa, hodi hatutan tan katak simplisidade, haraik-an, serenidade, no auzénsia ida ódiu nian marka profundamente eis-Xefe Estadu nia moris.

Bispu Leandro fó hanoin ba sira katak, ba sarani sira, mate la hakotu ligasaun ho sira ne’ebé mate ona maibé transforma relasaun ne’e liuhosi orasaun.

“Ita-nia saudozu la presiza ona sasán materiál sira. Buat ne’ebé nia presiza liu agora maka ita-nia orasaun sira. Reza ba nia signifika kontinua hatudu ita-nia domin no unidade ho ema ne’ebé hadomi tebes Timor-Leste,” Bispu Dioseze Baucau ne’e subliña.

Bispu konvida sarani no ema hotu ne´ebé prezente ihia missa ne´e atu hateke ba Lú-Olo nia kaixaun, hodi afirma katak maski silénsiu mate nian, ninia ezemplu kontinua hato’o mensajen ba povu timoroan.

“Bainhira ita haree ba kaixaun ida-ne’e, ita haree silénsiu. Maibé Lú-Olo la’ós nonook. Ninia moris kontinua ko’alia ba ita hotu. Kontinua husu ita atu tau matan ba nasaun ne’ebé nia ajuda harii liuhosi sakrifísiu barak tebes, atu líder sira hadomi malu, no hametin unidade nasionál, konsolida demokrasia, no promove justisa”, Bispu subliña.

Ba povu timoroan sira, bispu husik hela mensajen atu moris ho domin, perdua malu, no la’o hamutuk hodi realiza mehi Timor-Leste ida ne’ebé unidu.

Iha serimónia ne’e halibur autoridade másimu estadu nian, inklui Prezidente Repúblika, Prezidente Parlamentu Nasionál, Primeiru-Ministru Interinu, Prezidente Tribunál Rekursu, eis Xefe Estadu no Governu sira, líder polítiku sira, komandante militár sira, membru korpu diplomátiku sira, no veteranu sira luta libertasaun nasionál nian.

Hamutuk mós ho autoridade sira estadu nian, Padre sira, madre sira, no sarani atus ba atus mós partisipa, hamutuk iha orasaun durante missa requem  molok lori saudozu Francisco Guterres “Lú-Olo” ba haloot iha iha Jardin dos Herois iha Metinaro.

Jornalista: Remigia Locatelli/Editór: Vito Salvadór