Dom Leandro Maria Alves Husu Sarani Soibada banati tuir São José nia lala’ok Moris

Missa inaugurasaun Kapeliña São José no uma lisan Uma-Ki’ik no mós Jardim Saudozu Prezidente Nicolau dos Reis Lobato iha Sasatan oan, Soibada, Manatuto, Sabádu 19 Setembru 2026.

Soibada, 19 Setembru 2026 (RAFA)- Bispu Dioseze Baucau, Dom Leandro Maria Alves husu ba sarani sira iha Parokia Sagrado Coração de Jesus, Soibada, atu banati tuir São José nia lala’ok moris ne’ebé nakonu ho obediénsia, haraik-an, no serbisu maka’as.

Dom Leandro Maria Alves hato’o mensajen forte ne’e iha missa inaugurasaun Kapeliña São José no uma lisan Uma-Ki’ik no mós Jardim Saudozu Prezidente Nicolau dos Reis Lobato iha Sasatan oan, Soibada, Manatuto, Sabádu-ne’e.

“Kapeliña ne’e tau nia naran São José, ita hatene katak, doutrina Igreja nian hanorin São José mak Jesus nia aman hakiak. Jesus nia aman hakiak ne’e nu’udar títulu ida ne’ebé fó tiha nia oan, maibé la haraik ba mane ida naran iha mundu ne’e, só ba de’it São José, laiha tan ema seluk bolu hanesan Jesus nia di’ak. Títulu ida ne’e mós nu’udar onra ida ne’ebé Maromak hato’o ba Jesus de’it. Hatudu liu husi entrega Maria no Jesus, Maromak nia inan no Maromak nia oan ba São José nia liman,” hatete Dom Leandro Maria Alves iha omilia.

Dom Leandro esplika, ba de’it São José mak Maromak entrega nia oan mane mesak atu nia tau matan. São José ne’ebé nu’udar ema servisu na’in ida, nia transforma servisu sai ba fatin satidade ninian, katak servisu ne’e la’ós de’it atu ba moris, maibé servisu lori ema ba Nai Maromak. No São José nia servisu fatin sai fatin orasaun ninian. Servisu hodi serbí Maromak liu husi serbí ninia família, serbí Maria ho Jesus Kristu.

Tanba ne’e, servisu nu’udar hahalok responsabilidade ida serbí servisu ho onestidade, servisu ho ksolok, ida ne’e nu’udar asaun misionáriu ida katak iha ne’e fó sasin kona-ba Nai Maromak rasik, ida ne’e mak uluk iha São José.

São José hanorin atu rona no halo tuir, ohin iha evajellu oinsá mak Maromak haruka Anju ba ko’alia ho São José, “José keta ta’uk simu Maria nu’udar o nia kaben, basá nia kous ho espíritu santu nian.” José hader husi mehi, José halo tuir buat ne’ebé Nai nia anju haruka hodi simu nia kaben.

“Liafuan ida rona no halo tuir, labele rona de’it maibé rona no halo tuir, ida ne’e mak atetude ida ne’ebé São JJosé hatudu. Atetude ida ne’e presiza tebe-tebes dehan iha mundu ohin loron nian, rona no halo tuir.” Dom Leandro Esplika.

Bispu Dioseze Baucau ne’e hatutan, ohin loron bele dehan ema barak susar atu rona, tanba hotu-hotu hakarak ko’alia, ne’eduni to’o ikus ema dehan to’o ko’alia la rona malu. Ko’alia de’it la rona malu ona oinsá bele halo tuir tan, se la rona malu ida ne’e mak susar duni, tanba la rona malu susar atu halo tuir, entaun ema, sosiedade komesa ba atetude ne’ebé la respeitu malu. Ikus mai la hatene loos ida ne’ebé kurije ka ida-ne’ebé atu orienta ida ne’e.

“São José hatudu hahalok ida obidensia ida fiar nian, ida mak liu husi Abrão mós rona Maromak nia liafuan hafoin nia fiar iha Nai Maromak nia liafuan no fiar ba Maromak nia pás nian. Abrão halo tuir ida ne’e mak hahalok ne’ebé mosu husu ema hotu halo tuir.” Tenik nia.

Ne’eduni bele dehan ho kapeliña no mós Jardim no uma lisan atu hametin liu-liu mak pasu entre família sira no mós moris iha sosiadade nia leet iha Soibada.

São José ne’ebé rona Nai Maromak nia liafuan atu rona malu iha  moris loro-loron nian. São Jose mós hatudu hahalok ida ne’e katak nia la haree ba nia aan, maibé nia lori ba ema hasoru malu ho Jesus ida ne’e mak importante.

Nia hatutan, hanesan ho kapeliña no uma lisan, Jardim ne’e la’ós atu haketak malu, kapeliña lori ba ho Nai Maromak. Halo ne’ebé halibur hamahan ida ne’e atu bele hamutuk sai família ida de’it. Ne’eduni ema bainhira mai reza tur hakmatek kapeliña ida ne’e no hakarak atu tama ba halo relasaun kontaktu ho Nai Maromak, ida ne’ebé kontaktu ho Nai Maromak konserteja nia sei sai hanesan fatin ne’ebé mós atu halo ema halibur malu hodi mós hasoru malu ho Nai Maromak.

Nia reforsa, nune’e mós uma lisan mós hanesan la’ós hanesan fatin ne’ebé atu hasees fali ho maluk sira, maibé atu halibur malu sira hotu-hotu atu sai família ida de’it iha fiar ba Nai Maromak, iis moris ne’e mak Nai Maromak.

Tanba, uma lisan sira ne’e halibur atu hatene aan ne’e husi ne’ebé, maibé keta haluha katak husi Nai Maromak mak halo ema moris. Uma lisan halo ema koñese malu katak, família boot ida ne’ebé nia abut iha Nai Maromak.

Tanba ne’eduni ida ne’e mak haré hetan husi fó onra ba Saudozu Nicolau Lobato ne’ebé halo serbí hanesan ema fiar na’in iha Nai Maromak. Ezemplu ida ne’e mak buras no metin liután.

Jornalista: Cristina Ximenes