DNTT Kontinua Autoriza Taxi Kinur ho Kondisaun Di’ak no Seguru Halo Operasaun

Taxi kinur balu ne'ebé kondisaun di'ak no seguru sei bele halo operasaun. Imajen/dok.FM

Díli, 17 Juñu 2026 (RAFA.TL)- Diretora Nasionál Transporte Terrestres (DNTT), Mari Antónia Vitor da Costa, konfirma katak  DNTT nafatin autoriza  (fó lisensa) ba taxi kinur balun ne’ebé ho kondisaun di’ak  no seguru  halo operasaun  hodi tula pasajeiru sira.

“Ha’u hanoin totál taxi ne’ebé mak sei di’ak halo sirkulasaun hela  10-resin de’it, tanba ita hatene katak taxi sira ne’e kle’ur ona no barak laiha kondisaun atu sirkula,” Diretora DNTT ne’e informa  ba jornalista sira iha nia knar fatin, Díli, Tersa (16/06/2026).

Maria  Antónia Vitor da Costa esplika durante ne’e Diresaun Nasionál Transporte no Terrestre (DNTT) hapara ona taxi kinur sira ne’ebé mak laiha kondisaun atu sirkula hanesan transporte públiku no balu kontinua sirkula, tanba halo inspesaun iha DNTT hodi sertifika taxi balun sei iha kondisaun diak atu tula pasajeiru.

“Nafatin halo koordenasaun ho Polísia Tránzitu atu  halo pasa revista  karreta sira ne’ebé mak la ba halo inspesaun,” nia afirma tan.

DNTT kontinua husu kolaborasaun husi na’in ba karreta no motorizada sira atu mantein fó importánsia ba seguransa rodoviariu, maibé mós tenke ba halo rejistu no renova karta lisensa rejistu (KIR) hodi hetan sertifikasaun atu mantein halo operasaun tuir lei ne’ebé vigora.

Jornalista: João Carlos/Editór: Vito Salvadór