Diretór RAIMAKMOR Armando Ximenes Promete Devolve Kliente Na’in-92 Nia Osan iha Janeiru 2026

PNTL ho diretór kompañia RAIMAKMOR Armando Ximenes hasoru kliente na'in-92 ne'ebé ezije devolve sira-nia osan. Imajen/Rafa.tl

DILI, RAFA.tl – Diretór kompañia RAIMAKMOR, Armando Ximenes, promete  fó fila ka devolve kliente na’in-91 nia osan ne’ebé durante ne’e kontribui ba kompañia iha loron 26 fulan-Janeiru tinan 2026.

Notísia Relevante: Deskonfia Kompañia RAIMAKMOR Bosok, Vítima 51 Hato’o Keixa Ba Polísia

Abitante na’in-92 ne’ebé ezije sira nia direitu ne’e, durante loron rua tutuir malu, Tersa-Kuarta (16-17/12/2025), ba iha Polísia Eskuadra Vera-Cruz hodi hato’o keixa hasoru kompañia RAIMAKMOR tanba bosok sira hodi hatama osan atu hetan kréditu ho jurus ki’ik husi empreza refere.

Diretór Jerál Kompañia RAIMAKMOR, Armando Ximenes, iha Eskuadra Vera-Cruz liu husi nia deklarasaun promete ba kliente na’in-92 katak sei devolve ka reenbolsa sira nia osan iha loron 26 fulan-Janeiru 2026.

“Primeiru ha’u hodi kompañia nia naran hato’o deskulpa ba ita boot sira, dala ruma, ita boot sira hanoin dehan katak ita halai, maibé sistema ne’e investimentu ne’ebé iha estrutura ne’e mós ita iha nia diresaun, iha nia ezekusaun, los katak ha’u inisiadór, inisia para programa ne’e la’o ho di’ak. Maibé, ezekusaun ne’e la’os  ha’u mak direitu kaer no ha’u la iha direitu simu, buat hotu la’o tuir nia dalan, problema ita nian mak demora ezekusaun, tanba ne’e mak balun atu rezigna aan,” Diretór Jerál Kompañia RAIMAKMOR Armando Ximenes hateten.

Na’in ba kompañia RAIMAKMOR, promete ba vítima sira katak sei devolve ka reenbolsa sira nia osan iha loron 26 fulan-Janeiru tinan 2026, maibé tenke lori ho resibu banku nian, nune’e bele fasilita ho di’ak.

“Ne’ebé ha’u responsabilidade oinsá buka dalan para atu rezolve problema maluk sira nian ne’e to’o hotu, tanba ha’u mak inisia, maibé ezukusaun ne’e iha diresaun idak-idak, ita boot sira hatene dalaruma hatama mós husi prosesu, ita boot sira seidauk iha ema ida hatama direta osan mai ha’u hodi sai ba liur, ne’ebé buat hotu la’o ho ninia sistema, tanba ne’e iha komandu nia liman ne’e prosesu ida legál mos iha ona no ita ne’e mos ita nia advogadu Dr. Marito iha ne’e para atu bele trata hotu asuntu ida ne’e karik iha problema, maibé ha’u garante katak sei la falla, kuandu halo pagamentu mak la iha resibu banku ema sei la atende,” Nia esplika.

Iha fatin hanesan Inspetór Asistente Polísia Joel Pereira hatete, vítima ne’ebé naran iha lista hamutuk 92 ne’ebé imi pasiénsia oituan, labele uza nervozu no labele trata malu atu nune’e kompañia bele fó fila imi nia osan.

“Ha’u hanoin prosesu mak ne’e, husi karta akordu iha loron 16 fulan-Dezembru tinan 2025, tuku 12:00 OTL, Diretór Kompañia RAIMAKMOR hamutuk ho nia estrutura halo akordu ida ne’e iha Edifísiu Polísia Nasionál Timor-Leste (PNTL), Komandu Munisípiu Díli, hodi deklara katak dívida husi membru kompañia sira ne’ebé atu rezigna aan, ami estrutura kompañia deside no kompromete hodi deklara katak ami estrutura prontu reembolsa (devolve) osan, ne’ebé kliente sira hakarak atu sai ou rejigna aan husi kompañia RAIMAKMOR, ho nune’e kompañia sei halo pagamentu iha loron 26 fulan Janeiru tinan 2026,” Inspetór Asistente Polísia Joel Pereira deklara.

Antes ne’e,  Tersa (16/12/2025), Vise  Diretór kompañia RAIMAKMOR Martinho de Sá deklara, no iha akordu ho Polísia Eskuadra Vera-Cruz katak sei selu fila-fali vítima sira nia osan.

Ekipa ekipa Rafa.tl