Diplomata Indonéziu Krítika Prabowo Tanba Foku Liu Diplomasia Globál no Auzénsia iha Vizita Timor-Leste

Diplomata Indonézia no fundadór Foreign Policy Community of Indonesia (FPCI), Dino Patti Djalal

Díli, 13 Abríl 2026 (RAFA.tl) – Diplomata Indonéziu no fundadór Foreign Policy Community of Indonesia (FPCI), Dino Patti Djalal, krítika Prezidente Indonésia Prabowo Subianto tanba fó prioridade liubá relasaun globál no la fó atensaun sufisiente ba ASEAN.

Iha komentáriu públika iha rede sosiál, Dino Patti Djalal hatete katak, Prabowo nia vizita internasionál barak liu ba iha Europa, Ázia no Amérika, maibé vizita ba Estadu membru ASEAN sei limitadu tebes. Bazeia ba dadus ne’ebé nia aprezenta, iha últimu fulan-18, husi vizita internasionál 49, haat (4)  de’it mak ba Sudeste Aziátiku.

Dino Patti Djalal mós lamenta katak promesa atu vizita Timor-Leste seidauk realiza, apesar relasaun istórika forte entre país rua. Timor-Leste uluk iha istória konflitu no depois independénsia, relasaun kontinua iha prosesu rekonsiliasaun.

Nia alerta katak falta prioridade ba ASEAN bele prejudika kredibilidade Indonézia iha palku internasionál, no sujere katak país tenke fó foku liubá rejiaun ne’ebé nia iha influénsia direta.

Dino Patti Djalal mós krítika resposta ASEAN ba krize rejionál no defende katak lideransa futuru iha organizasaun tenke forte, independente no dedikadu ba interese ASEAN tomak.

Iha konkluzaun, nia dehan katak Indonésia tenke sai “motór” ba ASEAN, la’ós de’it partisipante pasivu, atu garante estabilidade iha rejiaun ne’ebé kada-vez sai difísil iha kontestu geopolítika globál.

Reportajen Ekipa Rafa.tl