Díli Internasionál Maratona Kontribui Ba Promosaun Turizmu Timor-Leste

Prezidente Repúblika, José Ramos-Horta.

Díli, 08 Agostu 2026 (RAFA)- Prezidente Repúblika (PR), José Ramos-Horta hateten Díli Internasionál Maratona (DIM), hanesan eventu internasionál ba Promosaun turismu Timor-Leste nian ba mundu.

Prezidente Repúblika (PR), José Ramos-Horta, Sábadu-ne’e iha ámbitu lansamentu eventu internasionál Díli Internasionál Maratona 2026,  informa eventu ida-ne’e partisipa husi sosiedade internasionál no sosiedade Timoroan rihun ba rihun, inklui ema rihun akompaña husu publikasaun mídia sira-nian ne’ebé hatudu Timor-Leste iha kapasidade organiza eventu boot nune’e segundu iha dame iha rai-laran no terseiru sira haré bonitu loos entaun turista sei mai. Ne’e maneira hanesan la’ós desportu de’it, halo mós promosaun turizmu Timor nian.

Xefe Estadu afirma, husi eventu Díli Internasionál Maratona ne’e fó mós impaktu ekonomia ba negosiante sira ne’ebé hetan apoiu husi Governu no setór privadu sira hodi hala’o atividade negósiu hodi faan sira nia produtu lokál iha exposizaun Díli Internasionál Maratona iha Palásiu Prezidensiál.

“Sirkulasaun osan iha ekonomia laran Timoroan no estranjeiru sosa hahan no sosa lebransa no impaktu emediata mak ida-ne’e. Impaktu ba hanesan fulan ruma nia laran ne’e turista sira haré entaun sira komesa hakarak mai sira haré tanba rai ne’e dame no avontade,” Xefe Estadu tenik.

Prezidente Repúblika subliña Díli Internasionál Maratona ne’e tama mós iha kalendáriu mundiál tuir regra no la’ós kualkér nasaun bele organiza no bainaka estranjeiru sira apresia Timor-Leste tanba bele organiza eventu ne’e ho di’ak tebes.

Jornalista: Zita Menezes