Deputadu Sira Husu Governu Hola Medida Imediata Ba Vitima Insédiu iha Merkadu Taibesi no Comoro

Plenária PN, Tersa 29 Setembru 2026.

Díli, 29 Setembru 2026 (RAFA)- Xefe Bankada Partidu Libertasaun Popular (PLP), Deputada Maria Angelina Sarmento, iha Parlamentu Nasionál, Tersa-ne´e hatete,  dadus ne’ebé Deputada ne’e hetan katak negosiasante sira ne’ebé sai vitima ba insédiu iha Merkadu Taibesi hamutuk 150 pesoál liu, no iha insédiu ne’e iha negosiante balu lakon sira nia osan,  husi montante  US$1700.00 to’o US$ 45,000.00  no barak mak la salva  sasan negósiu sira.

“Ami hakarak husu ba Governu liuliu Prezidente Autoridade Munisípiu Díli, atu orienta ekipa jestaun merkadu halo levantamentu ba dadus negosiante sira, sira nia tipu negósiu, prejuizu sasan hira, prejuizu osan hira,” hatete Deputada Maria Angelina Sarmento.

Deputada ne’e mós preokupa katak merkadu Taibesi laiha bee-moos, Toilet Públikú la hijiene, espasu ba negosiante sira laiha no   desorganizadu,  tanba ne’e husu Governu presiza tau atensaun hodi prevene insédiu iha Merkadu Taibesi.

Hatán ba kestaun ne’e Vise Ministru Asuntu Parlamentár Adérito Hugo da Costa informa nia parte sei envia asuntu kona-bá insédiu nia ba Ministériu relevante sira.

“Kona-bá komunidade afetadu sira ahi han Merkadu Taibesi nomós Comoro, ha’u hatene katak ha’u nia kolega membru Governu sira inklui Prezidente Autoridade Munusipíu Díli atua hela situasaun sira ne’e la sala ha’u sei envia pontu sira ne’ebé Deputadu sira aprezenta ba sira nia konsiderasaun,” hatete Vise Ministru Asuntu Parlamentár Adérito Hugo.

Entretantu insédiu ne’ebé akontese iha merkadu Taibesi  iha loron Sesta  25  Setembru 2026 kalan, no iha loron Domingo foin lalais ne’e akontese mós insédiu iha Merkadu Comoro,  insédiu sira ne’e akontese  tanba kauza husi sirkuitu eletriidade.

Jornalista : Zita Menezes