Defensór Públiku Tenke Hametin Integridade no Defende Justisa Bá Kbiit Laek Sira

serimónia tomada  Pose bá membru membru  Defensór Públiku na'in-haat iha Salaun Ministériu Justisa, Díli, Segunda 17 Agoatu 2026.

Díli, 17 Agostu 2026 (RAFA)- Defensór Públiku Jerál, Câncio Xavier hatete membru Defensór Públiku sira tenke hametin integridade no defende justisa bá povu kbiit laek hodi garante ema hotu asesu ba justisa ne´ebé justu no transparante.

Defensór Públiku Jerál, Câncio Xavier lia hirak ne’e iha nia  deklarasaun iha serimónia tomada  Pose bá membru membru  Defensór Públiku na’in-haat iha Salaun Ministériu Justisa, Colmera Segunda-ne’e.

Emposadu Defensór Públiku na’in-haat maka hanesan Diamantino Morais, Defensoria Públika bá Munisípiu Covalima,  Emílio Fátima Pereira Ribeiro Defensoria Públika bá Munisípiu  Díli,  Gianini Daos  Defensoria Públika  bá Munisípiu Dili no mós  apoiu  delegesáun bá Defensor Públiku Munisípiu Ermera, Mateus Bento Guterres,  Defensoria Públika  ba  Munisípiu  Covalima.

“Loron ohin la’ós de’it serimónia formál, maibé ohin komesa dalan profisionál foun. Hahú husi ohin, Defensór Públiku foun sira simu responsabilidade boot, la’ós ba sira-nia aan rasik, maibé atu tulun komunidade iha sistema justisa,” Câncio Xavier hatetem.

Defensór Públiku la’ós de’it tanba hatene lei no defende interese kliente, maibé defende mós  direitu ema nian, promove justisa no proteje ema sira ne’ebé presiza asisténsia jurídika.

Nia afirma tan Defensór Públiku mós iha responsabilidade atu kontribui ba harii Estadu Direitu Demokrátiku no forte.

Câncio Xavier husu defensór Públiku foun sira atu, bainhira hasoru situasaun difísil, sempre tau dignidade profisaun nu’udar prioridade. Defensór Públiku ne’ebé kompetente, presiza hametin integridade no iha korajen, maibé korajen tenke akompaña ho prudénsia.

“Defende ita-boot sira nia kliente ho determinasaun, maibé nunka sakrifika lia-loos no justisa,” nia subliña.

Iha fatin hanesan Vise-Ministru Justisa bá Asuntu Fortalesimentu Institusionál Paulo dos Remedios hatete empozadu Defensór Públiku ne’ebé foin simu pose tenke hala’o knaar jurídika hodi apoia populasaun ne’ebé moris ho vulnerabel ka populasaun ne’ebé laiha rekursu ekonómiku hodi asesu Justisa

“Iha estatutu Defensória Públika, hatene ema ne’ebé integra iha Defensór Públiku tenke haré didi’ak estatutu Defensória Públika, sira nia knaar atu fó apoiu jurídiku ba  populasaun vulneravel sira,”  Vise-Ministru Justisa bá Asuntu Fortalesimentu Institusionál Paulo dos Remedios afirma.

Governante ne´e subliña, Defensór Públiku la’ós apoia justisa bá emprezariu sira , ka ba ema ne’ebé riku.

Iha bibian ne’e mós Reprezentate Empozadu,  Defensór Públiku Emilio Fatima Pereira Ribeiro hatete, kareira  Defensór Públiku  ne’ebé sira simu, nobre tebetebes, tanba la’ós ema hotu-hotu bele tama iha Defensór Públiku.

“Atu tama iha ne’ebá liu-husi prosesu ida naruk,  tanba  ami lakon tempu kauze tinan  haat iha prosesu ne’e, tanba ne’e maka ohin ne’e hanesan hahú ida, mak ami simu Responsabilidade la’ós bá ami nia-an  de’it, bá ami nia família de’it,  maibé bá sosiedade Timor-Leste”, nia dehan.

Nia fundamenta, sei hala’o servisu bá  ema hotu ne’ebé  presiza Justisa, liu-liu sidadaun Timor-oan ne’ebé kbiit laiha,  hodi asesu Justisa.

Serimónia tomada Pose Defensóriu Públiku  bá dala-VII, hetan partisipasaun husi, Prezidente Tribunál Rekursu Afonso Carmona, Diretór Nasionál Polísia Sientífiku Investigasaun Kriminál (PCIC),, Vicente Fernandes e Brito, Advogadu Privadu sira, reprezentate husi Sentru Formasaun Júrídiku no Judisiáriu (CSFJJ)

Jornalista: Marcelino Tomae