Dadus Estimativa Pobreza 71% Husi Banku Mudiál La Refleta Kondisaun Timor-Leste

Vise-Ministra Finansa, Regina de Jesus Sousa.

Díli, 16 Setembru 2026 (RAFA) — Vise-Ministra Finansa, Regina de Jesus Sousa, hateten dadus estimativa taxa probreza atinji 71%, la refleta ho loos kondisaun ekonomia no probreza iha país ne’e.

Vise-Ministra Finansa, Rejina de Jesus Sousa, hateten ba jornalista sira iha Palásiu Governu, Kuarta-ne’e,  hateten dadus ne’e uza metodolojia global no bazeia ba rezultadu peskiza tinan 2014.

Tuir dadus husi Ministériu Finansa aprezenta liu husi peskiza ne’ebé hala’o iha 2024, ne’ebé hatudu taxa probreza iha Timor-Leste iha nivel 37%.

“Banku Mundiál uza metodolojia global. Rezultadu ne’e bazeia ba dadus tinan 2014. Banku Mundiál mós halo ona entrevista eskluziva kona-bá relatoriu ida-ne’e no sira esklarese ona asuntu balu,” Vise-Ministra Finansa ne’e  hateten.

“Dadus estatístika sei públika iha tempu badak. Rezultadu ne’ebé há’u hato’o ohin mak 37%, bazeia ba rezultadu peskiza ne’ebé ita halo iha 2024,” Regina Sousa afirma.

Nia mós informa katak Ministériu Finansas sei públika dadus kompletu kona-bá liña probreza no kondisaun ekonomia iha Timor-Leste, depois konfirma no halo koordenasaun ho Banku Mundial.

Publikasaun dadus foun ne’e sei objetivu atu fó esklaresementu ba públiku kona-ba situasaun probreza no kondisaun ekonomia atual iha Timor-Leste.

Jornalista: Remigia Locatelli