CSMJ Refuta Notísia Kona-bá Alegasaun Deliberasaun Disiplinár no Husu Atu Respeita Segredu Justisa

Díli, 27 Jullu 2026 (RAFA.TL) – Konsellu Superiór Magistratura Judisiál (CSMJ), ohin, refuta notísia sira ne’ebé espalla iha média sosiál kona-bá alegasaun deliberasaun iha matéria disiplinár, no hatete katak informasaun hirak-ne’e “la loos no sala”.

Iha komunikadu ida ne’ebé haruka ba RAFA.TL, CSMJ refere ba notísia sira ne’ebé publika iha mídia sosiál no órgaun komunikasaun sosiál, no afirma katak informasaun hirak-ne’e “la tuir faktu sira no la reflete ba konteudu deliberasaun sira ne’ebé Konsellu foti.”

CSMJ mós fó hanoin katak deliberasaun sira kona-bá matéria disiplinár tuir lei sei iha segredu justisa, bazeia ba Estatutu Magistradu Judisiál Timor-Leste nian no Kódigu Prosesu Penál ne’ebé vigora hela. Tuir CSMJ, prosesu disiplinár hotu-hotu sei iha hela segredu to’o desizaun ikus sai.

Iha komunikadu ne’e, CSMJ fó avizu ba ema sira ne’ebé fahe informasaun hirak-ne’e katak violasaun ba segredu justisa no espalla notísia falsu bele lori konsekuénsia kriminál, tanba asaun hirak-ne’e previstu no kastiga iha Kódigu Penál ne’ebé vigora.

Tuir CSMJ, dever atu rai segredu aplika ba Magistradu Judisiál hotu-hotu, Vogál sira, Sekretáriu sira, eis-Sekretáriu sira no funsionáriu Tribunál sira, tanba sira-nia funsaun, hatene informasaun kona-ba prosesu.

Konsellu mós haktuir prinsípiu konstitusionál kona-bá prejunsaun inosénsia, ne’ebé afirma katak ema ida-idak konsidera nafatin la sala to’o desizaun kondenasaun ne’ebé definitiva.

CSMJ subliña katak lei ne’ebé vigora tenke respeita husi ema hotu, inklui Magistradu Judisiál sira, no reafirma nia kompromisu atu hala’o nia knaar tuir legalidade ho rigor.

Iha komunikadu ne’e, CSMJ mós reafirma katak nia mak órgaun konstitusionál ida ne’ebé iha kompeténsia eskluziva atu trata matéria disiplinár ba Magistradu Judisiál sira. Kompeténsia hirak-ne’e inklui nomeasaun, kolokasaun, transferénsia no promosaun ba juíz sira, tuir lei ne’ebé vigora.

Konsellu mós rejeita forma hotu-hotu ba interferénsia husi parte externa iha nia kompeténsia. CSMJ dehan katak sei la simu intervensaun husi partidu polítiku sira, organizasaun sira ne’ebé la rejista iha Timor-Leste, organizasaun sira ne’ebé la iha órgaun sosiál eleitu tuir Kódigu Sivil, no asosiasaun unipesoál ka responsabilidade limitadu sira.

Deklarasaun ida-ne’e mosu iha kontestu ida ne’ebé anteriormente CSMJ rejeita ona kritika husi entidade externa sira, inklui União Internacional de Juízes de Língua Portuguêsa (UIJLP).

“Konsellu Superiór Magistratura Judisiál sei kontinua hala’o nia kompeténsia ho independénsia, imparsiálidade no respeitu tomak ba Konstituisaun no lei sira Repúblika Demokrátika Timor-Leste nian.”

Ekipa Reportajen Rafa.tl